6.1 KiB
46. Павло тэрдёл сыклярдэса ко Иисусо.
Дэ дола дэвэса дживэлас екх мануш савэс кхарэнас Савло. Ёв на прылэлас сыклярибэн Исусоско. Савло сыс пэ дова штэто, кай чурдэнас бара дэ Стефаностэ, и ракхэлас ёв идя манушэнгири, савэ умарэнас Стефанос. Тэнче Савло лыя тэ традэл патянкунэн. Ёв пхирэлас кхэрэстыр до кхэр до Иерусалимо, вхтылєлас муршэн и джювлен и чурдэлас до бэшибэн. Екхвар Савло явья ко баро рашай и мангья лэстыр лыла ко синагоги до Дамаско, соб лэстэ тэ авэл зор тэлэ лэн и тэ бичявэ до Иерусалимо манушэн савэ патянас дэ Иисусостэ.
Сыр дынэ лэскэ адалэ лыла, Савло традыя до Дамаско. Сыр Ёв сыс нанэ дур форостыр, бари яг болыбнастыр захачкирдя саро паш лэстэ, и Савло пэя пэ пхув. Ёв шундя, сыр Варикон-то пхэндя: «Савло! Савло! Соскэ ту традэс Ман?» Савло пучя: «Кон ту Дэвла?» Глос пхэндя: «Мэ — Иисусо, Савэс Ту традэс!»
Сыр Савло гадыяпэ пхувьятыр, ёв ничи на дыкхэлас. Мануша савэ сыс лэса отлыджинэ лэс до Дамаско. Трин дэвэс ёв ничи на хая и на пия.
Дэ Дамаско джиндя сыклярдо савэс кхарэн Анания. Дэвэл пхэндя лэскэ: «Джя до кхэр, кай тэрдыя Савло. Чив пэ лэстэ васта, соб ёв тэ дыкхэл». Анания пхэндя: «Сыклымарё, мэ шундём, со Адава мануш традэл патянкунэн». Дэвэл лэскэ пхэндя: «Джя! Мэ выкэдыём лэс, соб ёв тэ роспхэнэл пал Мандэ евриенгэ и авирэнгэ манушэнгэ. Ёв трэби тэ перелыджял бут пхарипэн ваш Мангэ»
Анания гия ко Савло, чидя пэ лэстэ васта и пхэндя: «Иисусо Саво явья тукэ пэ дром, бичядя ман, соб мэ тэ откэрав тукэ якха и соб ту тэ дыкхэс и тэ зджял пэ тутэ Свэнто Духо». Тэнче Савло лыя тэ дыкхэл якхэнса, и Анания болдя лэс. Савло набутка хая, и кэ ёв рисия зор.
Савло ачяпэ нанэ бут дэвэса до Дамаско сыклякирдэнса Иисусоскирэнса и роспхэнэлас евриенгэ дэ синагоги. Ёв ракирлас: «Иисусо — Чаво Дэвлэско!» Евреи на полэнас со кэрдяпэ, со кэ дава Ёв традэлас патякунэн, а кана кокоро атча тэ патя дэ Иисусостэ! Савло допхэнэлас лэнгэ, со Иисусо сыс Мессия.
Прогинэ дэвэса и иудеи савэ на патянас дэ Иисусостэ закамнэ тэ умарэн Савлос и скэрдэ ваш дава саро. Ёнэ бичядэ манушэн тэ дужакирэн лэс дэ форытка вудара, соб тэ умарэн лэс. Нэ Савло уджиндя адава, и лэскирэ пшала дынэ лэскэ тэ нашэ. Ратяко ёнэ змэкнэ лэс дэ бари корзина пир форытко стена. Сыр Савло настя с Дамаска, ёв всаек роспхэнэлас пал Иисусостэ.
Савло гия до Иерусалимо, соб тэ дыкхэпэ апостолэнса, нэ сарэ дарэнас лэстыр, на патянас, со ёв кана сыклякирдо Иисусоско. Тэнче екх патянкуно савэс кхарэн Варнава яндя Савлос ко апостолы. Ёв роспхэндя лэнгэ, сыр Савло зоралэс роспхэнэлас до Дамаско. Тэнче апостолы прылынэ Савлос.
До Иерусалимо традэнас патянкунэн, савэ нашнэ дур до форо Антиохия и роспхэнэнас одой пал Иисусостэ. Бут манушэн дэ Антиохия на сыс евриенса, нэ шундэ лав сыклякирдэндыр пал Иисусостэ, ачнэ патянкунэнса. Ада перва мануша, савэ на сыс евреенса, нэ патяндынэ дэ Иисусостэ сыр дэ Дэвлэскирэ Чавэстэ. Варнава и Савло гинэ дэ Антиохия, соб бутыр тэ роспхэнэ нэвэнгэ сыклякирдэнгэ пал Иисусостэ и тэ подрикирэн кхангири духоса. Дэ Антиохия патянкунэн дэ Иисусостэ лынэ тэ кхарэн «христианэнса».
Екхвар, сыр сыклярдэ Иисусоскирэ дэ Антиохия сыс до посто и мангэнаспэ, Свэнто Духо пхэндя лэнгэ: «Откэдэн ваш Мангэ Варнавас и Савлос, соб ёнэ тэ кэрэн одова, кэсо Мэ лэн прыкхардём». Патянкунэ дэ Антиохия по мангнэпэ пал Варнавастэ и Савлостэ чидэ пэ лэндэ пэскирэ васта. Тэнче Варнава и Савло угинэ с Антиохии и сыклякирэнас манушэн, и бут лэндыр патяндынэ дэ Иисусостэ.
Библейско история буты апостолэнгири 8:3; 9:1-31; 11:19-26; 13:1-3