5.3 KiB
43. Сыр кэрдяпэ кхангири
Сыр Иисусо рисия до болыбэн, Лэскирэ сыклякирдэ ачэнаспэ до Иерусалимо, сыр Ёв лэнгэ и пхэндя. Ёнэ скэдынэпэ кхэтанэ соб тэ мангэнпэ.
Екхвар до бєр, сыр проджян пандэша дэвэс пал Патради, евреи кэрэнас свэнко жатва марэскири, сави кхарэласпэ Пандэшитко. Евреи сарэ свэтостыр скэдэнаспэ до Иерусалимо, соб тэ пролыджя свэнко кэтанэ. Дэ дова бэрш, сыр Иисусо Исыс умардо и уштыя мулэндыр, Пандэшитко дэвэс исыс варикай куркєстыр, сыр Исусо рисия до болыбэн.
Пэ пандэшитко свэнко сарэ патянкунэ Исыс кэтанэ. Кхэр до саво ёнэ сыс, пхэрдыя гласоса, сыр бари бавал. Катхыр лыяпэ ангил лэнгиро шэро явья дасаво сыр чиба ягытка. Сарэ патякунэ сыс пхэрдэ Свэнтонэ Духоса и лынэ тэ ракирэн пал Дэвлэстэ пэ авир чиба. Ёнэ на джиндэ пир сави чиб ракирэн, нэ ада исыс чиба, пэ савэ дыя лэнгэ тэ ракирэн Свэнто Духо.
Сыр мануша до Иерусалимо шундэ адая глос, скэдынэпэ кэтанэ. Сарэ камнэ тэ подыкхэн, со кэрэлпэ. Адалэ мануша сыс всарэ форэндыр, и ракирэнас пэ всарэ чиба, а сыклякирдэ Иисусоскирэ сыс Галелеятыр и ракирнас по-арамейско и по-греческо чип. Нэ дэ дава дэвэс сыклярдэ ракирэнас пэ авир чиба и мануша на полэнас со кэрэласпэ, дякэ сыр кажно мануш шунэлас ракирибэн пэ пэски чип, лошалэ лава со кэрдя Дэвэл.
А авир мануша лынэ тэ санпэ и тэ ракирэн, со сыклякирдэ пинэ бравинта и поматынэ. Нэ Петро годласа пхэндя лэнгэ: «Пошунэньте ман! Адалэ мануша нанэ матэ. Тумэ акана дыкхэн, со ракирэлас пророко Иоилё: «Со авэна дэвэса сыр Мэ бут прочивава Миро Духо пэ сарэндэ манушэндэ».
Пошунэньтэ, израильтяне, Иисусо сыс Мануш, саво кэрэлас бут чуды, соб тэ сыкавэл кон Ёв сыс. Ёв кэрэлас адалэ чуды Дэвлэскирэ зорьяса. И тумэ джинэн, и саро дыкхнэ адава кокорэ. Нэ тумэ прымардэ Лэс по трушул!
Тумэ умардэ Иисусос,Нэ Дэвэл гадыя Лэс мулэндыр. Дякэ ракирэласпэ до пророчество, дэ саво сыс чиндо: «Ту на домэкэса Тырэскэ Свэнтонэскэ тэ пасёл дэ могила вечно». И амэ дыкхьям одова, со Дэвэл рискирдя Иисусос ко джиипэН.
Дэвэл-Дад дыя Иисусоскэ тэ бэшел пэ право васт Пэстыр. А Иисусо бичядя амэнгэ Свэнтонэс Духос, сыр и ракирдя. И адава Свэнто Духо кэрэл саро, со тумэ дыкхэн и шунэн.
Тумэ примардэ ко трушус Манушэс, савэс кхарэн Иисусо. Нэ джинэн, со Дэвэл скэрдя Лэс Мессияса и Хуласа пэ саро, со сын дэ свэто».
Мануша, шунэнас Петроскирэ лава, задуминдэпэ. Ёнэ пучнэ Петрос и сыклякирдэн: «Пшала, со же амэнгэ тэ кэрэс?»
И Петро пхэндя: «Тумэнгэ сарэнгэ трэби, соб Дэвэл тэ простинэл тумарэ бэзэха. Мэк мануш порисёла ко дэвэл и болэлапэ до лав Иисусоско Христоско. Тэнче Дэвэл дэла тумэнгэ Свэнтонэс Духос».
Дэ дова дэвэс варикай 3000 манушэн патяндынэ со ракирэлас Петро. Ёнэ помангнэ Дэвлэс тэ простинэл бэзэха, болдэпэ и загинэ дэ кхангери, и ачнэ сыклякирдэ Иисусоскирэ.
Патянкунэ скэдэнаспэ кэтанэ. Ёнэ шунэнас со сыклякирэнас апостолы, мангэнаспэ и славинэнас Дэвлэс. Кэтанэ ханас и саро со лэндэ сыс ёнэ розчурдэнас машкир пэстэ. Сарэ до форо ракирэнас пал лэндэ лачипэн. Дэвэс дэвэсэстыр мануша ачэнаспэ патянкунэнса.
Библейско история апостолэнгири буты, шеро 2