5.7 KiB
42. Иисусо рисёл до болыбэн.
Дэ дова дэвэс, сыр Дэвэл гадыя Иисусос мулэндыр, дуй лэскирэ сыклякирдэ джянас до авир форо. Пиро дром, ёнэ ракирэнас пал дова, со кэрдяпэ Иисусоса, и сыр ёнэ думиндэ, со Иисусо Дова Мессия саво дэла воля Израилёскэ. Нэ а Лэс умардэ. Тэнче джювля пхэндэ, со Ёв всаек джюдо. Сыклякирдэ на наджинэнас, конэскэ кана тэ патя.
Сыр адалэ дуй сыклякирдэ джянас и ракирэнас, кэ ёнэ подгия Иисусо и гия лэнса. Ёв пучя, пал со тумэ ракирэн, а ёнэ думиндэ со Ёв авирэ форостыр, со на джиндя со кэрэлпэ до Иерусалимо, и роспхэндэ Лэскэ саро, со сыс Иисусоса пал далэ дэвэса.
Тэнче Иисусо лыя тэ роспхэнэл лэнгэ, со сыс чиндо пал Моисеёсте дэ Дэвлэско Лав. Гара пророки ракирэнас, со захалэ мануша кэрэна со Мессия перелыджяла дукха и умарна Лэс. Дякэ ж пророки ракирэнас, со пэ трито дэвэс Мисия вштэла мулэндыр.
Тэнче сыклякирдэ пхэндэ екх екхэскэ: «Ада сыс Иисусо! Гэна пал со амэ дякэ шунасас Лэс, сыр Ёв роспхэнэлас амангэ Лав Дэвлэскиро!» И Ёнэ гинэ палэ до Иерусалимо. Сыр Ёнэ одорик явнэ, то роспхэндэ авирэнгэ сыклякирдэнгэ: «Иисусо джидо! Амэ дыкхьям Лэс!»
Сыр сыклякирдэ пал дава роспхэнэнас, то кэ ёнэ до кхэр явья Иисусо. Ёв пхэндя лэнгэ: «Бахт тумэнгэ!» Сыклякирдэ подуминдэ, со када призрако, нэ Иисусо пхэндя: «Соскэ тумэ дарэн? Соскэ тумэ на патян, со када Мэ? Подыкхэн пэ Мирэ васта и гэра. Ко призрако нанэ трупо.» И соб тэ допхэнэ лэнгэ, со Ёв нанэ призрако, Иисусо помангья лэндыр хабэн. Ёнэ дынэ Лэскэ котыр мачё, и Ёв хая лэс.
Тэнче Иисусо пхэндя: «Мэ ракиравас тумэнгэ, со саро чиндо пал Мандэ дэ Дэвлэско Лав трэби дякэ и тэ авэл, дякэ саро и кэрдяпэ». Тэнче Иисусо роскэрдя Дэвлэско Лав соб ёнэ тэ полэн. Ёв пхэндя: «гара пророки чинэнас, со Мэ, Мессия, пролыджява бут пхарипэна, мэрэва и пэ трито дэвэс вштава мулэндыр.
Пророки дякэ ж чинэнас, со Мирэ сыклякирдэ авэна тэ роспхэнэн Дэвлэско Лав. Ёнэ Лэна тэ прыкхарэн манушэн, соб ёнэ тэ порисён ко Дэвэл и тэ ачавэн бэзэха. И тэнче Дэвэл простинэла манушэнгэ бэзэха. Мирэ сыклякирдэ лэна тэ роспхэнэн адава пир саро свэто и, авэла ада Иерусалимостр, и джяна кэ сарэ мануша. Тумэ роспхэнэна саро, со тумэ дыкхнэ, со Мэ тумэнгэ пхэндём, со кэрдём, и со манса кэрдяпэ».
Тэнчэ Саранда дэвэс Иисусо бут молы сыкавэласпэ Пэскирэ сыклякирдэнгэ. Екхвар Ёв сыкадяпэ дэ екх дэвэс бутэ манушэнгэ, савэн исыс варикай панчьшела манушэн! И бут молы Иисусо допхэнэлас Пэскирэнгэ сыклякирдэнгэ, со Ёв джидо, и сыклякирэлас лэн пал Дэвлэскиро Царство.
Иисусо пхэндя Пэскирэнгэ сыклякирдэнгэ: «Дэвэл дыя мангэ зор до болыбэн и пэ пхув. Пал дава Мэ пхэнав тумэнгэ, джяньте кэ сарэ мануша и сыклякирэн лэн. Болэн лэн до лав Дадэско, Чавэско, и Свэнтонэ Духоско. Тумэ трэби тэ сыклякирэн лэн тэ кэрэн саро, со Мэ тумэнгэ ракирдём. И Рипирэн, со Мэ авава тумэнса».
Прогия саранда дэвэс, сыр Иисусо вштыя мулэндыр, Ёв пхэндя пэскирэнгэ сыклякирдэнгэ: «Аченпэ дэ Иерусалимо, кэ дова дывэс сыр Миро Дад на дэла тумэнгэ зор. Ёв бичявэла тумэнгэ Свэнтонэс Духос» Тэнче Иисусо гадыяпэ до болыбэн, и облоко закэрдя Лэс лэндыр. Кана, Иисусо хулай пэ саро, со сын до свэто, бэшто по троно по право васт Дэвлэстыр до болыбэн.
Библейско история Евангелия Матфеёстыр 28: 16-20, Евангелия Маркостыр 16: 12-20, Евангелия лукастыр 24: 13-53, Иоанностыр 20: 19-23 и буты апостолэнгири 1: 1-11