4.0 KiB
40. Иисусос примардэ ко трушул
Тэнче сыр счингирдэ чукненса римска мануша лыджинэ Иисусос, соб тэ прымарэн Лэс по трушул. Ёнэ дынэ Лэскэ тэлыджял трушул, пэ саво Лэс прымарэна.
Иисусос яндэ по штэто саво кхарэлпэ Голгофа, пэ саво ракирэн «Черепо». Одой Лэс примардэ ко трушул, примардэ Лэскирэ васта и гэра. Иисусо подыкхья до болыбэн и пхэндя: «Дадо, простинэ лэн, пал дава со на джинэн, со кэрэн». Римска мануша примардэ табличка паш шэро Иисусоско. Пэ латэ сыс чиндо «Царё иудейско», сыр припхэндя тэ чинэ Пилато.
Римска мануша чурдэнас жребиё, соб тэ джинэ, конэскэ дорэсэлапэ Иисусоски идя. Дякэ сыс сыр пхэндэ пророки дэ Дэвлэско Лав: «Ёнэ росчурдынэ идя машкир пэстэ и чурдэнас пал латэ жребиё».
Паш Иисусостэ сыс примардэ дуй чёра, чудэ лэнгирэ трушила пэ дуй рига Лэстыр. Екх чёр лыя тэ подсал Иисусос, а авир пхэндя лэскэ: «Хиба ту на дарэс, кай Дэвэл марла тут? Амэ бангэ дэ дова со кэрдям дэ, а адава Мануш нанэ банго ни дэсо». Тэнче ёв пхэндя Иисусоскэ: «Мангав Тут, зрипир ман, сур явэса дэ Пэскиро Царство». Иисусо пхэндя лэскэ: «Дадэвэс ту авэса Манса дэ раё».
Сарэ мануша, и барэ рашая, мануша савэ куч джинэн Законо и пхурэ мануша подсанас Иисусос. Ёнэ ракирэнас Лэскэ: «Сыр Ту — Дэвлэскиро Чяво, то зджя трушулэстыр и заракх кокоро Пэс! Тэнче амэ патяса дэ Тутэ».
И болыбэн покалыя, а и сыс ада машкир дэвэс. И дава калыпэн джялас трин часы.
Тэнче Иисусо дрыван пхэндя: «Скэрдяпэ! Дад, Мэ одав Миро Духо дэ Тырэ васта». Тэнчэ Ёв обмэкья шэро и мэя. И лыя тэ тринскирэлпэ пхув. А дэ Кхэр Дэвлэско бари церга, сави закэрэл манушэн Дэвлэстыр, розчиндяпэ пэ дуй рига упрал кэ низо.
Кана сыр Иисусо мэя Ёв откэрдя дром манушэнгэ, соб сарэ тэ явэн ко Дэвэл. Сыр римско мануш саво ракхэлас Иисусос, удыкхья саро, со сыс, ёв пхэндя: «Адава Мануш чячё сыс нанэ банго! Ёв — Дэвлэско Чаво».
Тэнче дуй мануша — Иосифо мануш иудейсконэ шералэндыр и фарисеё Никадимо — явнэ ко Пилато тэ мангнэн кэ ёв трупо Иисусоско. Ёнэ патянас со Иисусо сыс Мессия. Иосифо и Никадимо закэрдэ трупо дэ церга, отлыджинэ кэ гробница, сови кэрды дэ бэрга, и чидэ Лэс одорик. Тэнчэ ёнэ причидэ баро бар кэ гробница, соб тэ на заджял ни кон.
Библейско история Еванглия Матфеёстыр 27: 27-61, Еванглия Маркостыр 15: 16-47, Еванглия Лукастыр 23: 26-56 и Еванглия Иоанностыр 19: 17-42