5.1 KiB
39. Иисусо тэрдо ангил сэндо
Машкир рат яндэ Иисусос до кхэр ко баро рашай, пал дова со ёв камья тэ допучел Иисусос. Петро джялас пал лэндэ нэ кэ ёнэ наподжялас. Сыр Иисусос андэ ко баро рашай, Петро ачеласпэ до дворо и подгия кэ яг, паш сави татёнас слуги и стражники.
Пураныпэн евреендыр и законоскирэ сыкламаря лынэ тэ сэндякирэн Иисусос до кхэр ко баро рашай. Ёнэ попынэ бут хоханэн манушэн, савэ йивья ракирэнас пэ Иисусостэ. Нэ лэнгирэ лава на зжянаспэ, и ёнэ на допхэндэ бангипэн Иисусоско. Кокоро Иисусо ничи на ракирэлас пал Пэстэ.
И сыр баро рашай подыкхья пэ Иисусостэ и пучя: «Пхэн амэнгэ, Ту Мессия, Чаво джидэ Дэвлэскиро?»
Иисусо пхэндя: «Да, Мэ — Мессия, и тумэ дыкхэна Ман, сыр Мэ бэшто паш Дэвлэстэ и явава болыбнастыр». Баро рашай росчиндя пэ пэстэ гад, пал дова со лава Иисусоскирэ яндэ лэс дэ холы. Ёв загодлыя: «Амэнгэ бутыр на трэби мануша, савэ лэна тэ ракирэн со кэрдя адава Мануш! Тумэ кокорэ шундэ, сыр Ёв пхэндя, со Ёв — Чаво Дэвлэско. Со тумэ пхэнэна Лэскэ»
Сарэ, кон одой сыс, загодлынэ барэ рашаскэ: «Ёв молэл тэ мэрэл!» Ёнэ запхандэ Иисусоскэ якха, лынэ тэ чунгардэн пэ Лэстэ, тэ марэ Лэс и тэ санпэ Лэстыр.
Петро дужакирэлас до дворо. Лэс удыкхья екх манушны. Ёй пхэндя лэскэ: «Ту сыс Иисусоса!» Нэ Пэтро на приджиндяпэ. Тэнче авир манушны пхэндя лэскэ дова со и англатуны пхэндя, нэ Петро и адай на приджиндяпэ. Тэнче авир мануша пхэндэ: «Амэ джинас, со ту сыс Иисусоса, тумэ сарэ дуй Галеятыр ».
Петро лыя тэ солахал, со ёв на джинэл Иисусос. Ёв ракирдя: «Солахав, мэ на джинав адалэс Манушэс и на полав пал со, тумэ ракирэн!» Тэнче Иисусо порисия, подыкхья пэ Петростэ, и ёв зрипирдя, сыр Иисусо пхэндя лэскэ: «Дадэвэс ратяко, сыр загодлэла башно, ту трин молы отпхэнэса, со на джинэс Ман».
Петро выгия дворостыр и дрыван ровэлас.Дэ дова дэвэс И Иуда уджиндя, со Иисусос савэс ёв здыя камэн тэ умарэ. Ёв, зарундя, рискирдя ловэ барэ рашаенгэ и пхурэдырэ манушэнгэ, а тэнче гия и убладыя.
Дэ долэ дэвэса римско хулай дэ Иудея сыс Пилато. Барэ рашая и пхурэ мануша Израилёскирэ яндэ Иисусос ко Пилато. Ёнэ камнэ, соб римско хулай тэ сэндякирэл Иисусос и тэ приракирэл Лэс тэ умарэн. Пилато пучя ко Иисусо: «Ту — Царё Иудейско».
Иисусо пхэндя: «Ту чачибэн пхэнэс. Нэ Миро Царство нанэ пэ дая пхув. Тэавэл адава адякэ, то Мирэ слуги бы марэнаспэ пал Мандэ. Мэ явьём пэ пхув, соб тэ роспхэнэ чачибэн пал Дэвлэстэ. Сарэ кон, камэл чачибэн, шунэн Ман». Пилато пучя: «Со исын чачибэн?»
Сыр поракирдя Иисусоса, Пилато выгия ко мануша и пхэндя: «Мэ на попэём нисаво бангипэн, дэ адалэ Манушэстэ, соб тэ умарэ Лэс». Нэ сарэ лынэ тэ годлэн: «Прымар кэ трушул Лэс!» Пилато пхэндя: «Ёв накэрдя ничи, со тумэ ракирэн пэ Лэстэ». Нэ ёнэ лынэ тэ годлэн дрыванэдыр. Тэнче Пилато пхэндя дэ трито моло: «Ёв нанэ банго!» Нэ мануша загодлынэ дрыванэдыр: «Прымар кэ трушул Лэс!»
Библейско история Еванглия Матфеёстыр 26: 57-27: 26, Еванглия Маркостыр 14: 53-15: 15 Еванглия Лукастыр 22: 54-23: 25 и Еванглия Иоанностыр 18: 12-19: 16