4.9 KiB
35. История сыр чаво угия дадэстыр
Екхвар Иисусо сыклякирэлас манушэн, савэ скэдынэпэ лэс тэ пошунен. Лэндыр сыс мануш саво скэдэлас ловэ манушэндыр и авир мануша, савэ на дживэнас пир законо Моисеёско, и пал дова лэн гинэнас со ёнэ дживэн дэ бэзэха.
Фарисеи и сыклякирдэ пиро законо удыкхнэ, со Иисусо ракирэлас одолэнса манушэнса сыр пэскирэнса. Пал дова ёнэ лынэ тэ холясон и тэ ракирэн екх екхэскэ: «Ёв кэрэл нанэ куч, ракирэл манушенса и хал лэнса и пьел савэ дэ бэзэха». Иисусо шундя со ёнэ ракирэн и роспхэндя дасави история:
«Кэ екх мануш сыс дуй чавэ. Екхвар тыкнэдыр чаво пхэндя дадэскэ: “Дадо, мэ камав тэ лав пэскиро барвалыпэн дадэвэс!” Тэнче дад пэскиро барвалыпэн дыя дуенгэ пэскирэнгэ чавэнгэ по паш.
Тэнче тэкнэдыр чаво залыя саро, пэскиро барвалыпэн, и угия дур до авир форо, одой ёв роскэрдя саро пэскиро барвалыпэн и дживэлас сыр камэлас до бэзэха.
Сыго дэ дова форо кэрдяпэ баро бокхалыпэн, а лэстэ на ачнэпэ ловэ по хабэн. Пал дава ёв гия бутярнэса тэ дыкхэл балычен. Ада сыс екх буты, сави ёв попэя.Ёв бокхалыя дякэ со сыс лошало тэхал балыченса кэтанэ нэ и дава лэскэ надэнас.
Тэнче, тэкнэдыр чаво пхэндя пэскэ: “Со мэ кэрав? Кэ миро дад бут бутярнэн, и сарэ ёнэ хан и чалён, а мэ адай мэрав бокхатыр. Рисёвава кэ миро дад и мангавапэ кэ ёв бутярнэса”.
И тэкнэдыр чаво гия палэ кэ дадэскиро кхэр. И сыр ёв сыс дур кхэрэстыр, дад удыкхья лэс и зарондя пал лэстэ. Ёв прастандыя кэ пэскиро чаво, облыя лэс и чамудэлас лэс.
Чаво пхэндя: Дадо, мэ кэрдём бэзэх ангил Дэвлэстэ и тутэ. Мэ на молав тэ авав тырэса чавэса.
Нэ дад пхэндя пэскирэ бутярнэнгэ: Сыгэдыр джянте янэнте хвэдыр идя и урьенте пэ мирэ чавэстэ! Дэнте ангрусны пэ лэскиро васт и тэраха пэ гэра. Тэнче зачинэнте лачес гуровэс. Амэ аваса тэхас и тэ кэрас свэнко, пал дова со миро чаво сыс муло, нэ кана ёв джидо! Ёв исыс хаскирдо, а кана попэяпэ!
Свэнко сыс ваш всарэнгэ. Сыго пхурэдыр чаво явья кхэрэ малендыр, кай ёв кэрэлас буты. Ёв ушундя гиля и кхэлыбэн и, подкхардя екхэ бутярнэс, и пучя, со одой кэрэлпэ.
Сыр пхурэдыр чаво уджиндя, со до кхэр свэнко, пал дова со рисия лэскиро пшал, ёв дрыван холясыя и на загия до кхэр. Дад выгия и мангэлас лэс тэ заджял, соб тэ авэл лошало пэ да свэнко лэнса кай рисия чаво, нэ ёв отпхэндяпэ.
Пхурэдыр чаво пхэндя дадэскэ: “Всарэ адалэ бэрша мэ патываса кэравас пэ тутэ. Мэ кандавас тут, нэ ту на дэсас мангэ ни екхэс бакрорэс, соб мэ тэ авав лошало пэскирэ манушэнса. А адава чаво роскэрдя тыро барвалыпэн по джиипэн до бэзэха. Кана ёв рисия кхэрэ, и ту зачиндян лачес гурувэс, соб тэкэрэ свэнко!”
Дад пхэндя: “Чаво миро, ту дживэс манса, и саро миро, — тэро. Амэ кэрас дяке сыр трэби, кай кэрас дава свэнко. Пал дава со тыро пшал сыс муло, а кана ёв джидо. Ёв сыс хаскирдо, а кана попэяпэ!”»
Библейско история Еванглия Лукастыр 15:11-32