4.9 KiB
32. Иисусо састякирдя манушэс савэс рикирэлас бэнга, и насваля джювля
Иисусо и Лэскирэ ыклякирдэ угинэ пэ лодка до форо, кай дживэнас герасинска мануша. Ёнэ докэдынэпэ кэ брэго и выгинэ лодкатыр.
Одой дживэлас мануш, дэ савэстэ исыс бэнг.
Ёв сыс дрыван зорало, со ни кон лэс наврикирлас. Мануша бут молы спхандэнас лэскирэ гэра и васта саструнэ шэлэнса, нэ ёв росчинэлас лэн.
Адава мануш дживэлас по могилки. Ёв годлэлас дэвэс и рат, сыс нанго и чинэлас пэс барэнса.
Ёв прыпрастандыя ко Иисусо и тэрдыя паш Лэстэ по чанга. Бэнг дэ далє манушэстэ загодлыя дрыван: «Со ту камэс мандыр, Иисусо, Чаво Дэвлэско? Мангав на хаскир ман!»
Иисусо пхэндя бэнгэскэ: «Выджя адалэстыр манушэстыр!» Тэнче Иисусо пучя бєнгэстыр: «Сыр тут кхарэн?» Ёв пхэндя: «Легионо, пал дова со амэн бут».
Бэнга лынэ тэ мангэпэ ко Иисусо: «Мангав Тут, на бичяв амэн адалэ штэтэндыр»! Нанє дур пє бєрга чярёнас балыче. Бэнга помангнэ Иисусос: «Мангас, бичяв амэн дэ долэндэ балычендэ!» Иисусо дыя лэнгэ тэ кэрэн адава.
А балычен сыс одой 2000 шэрэ. Бэнга выгинэ манушэстыр и загинэ дэ балычендэ. И чурдынэпэ ёнэ бэргатыр дэ рэка и тасадынэ.
Сыр удыкхнэ адава пастухи савэ ракхэнас балычен, ёнэ прастандынэ до форо и роспхэндэ сарэнгэ пал дава, со кэрдя Иисусо. Мануша явнэ форостыр и удыкхнэ манушэс дэ савэстэ сыс бэнга. Ёв сыс дэ пэстэ, уридо и лыджялас пэс манушиткэс.
Мануша дрыван здарандынэ и мангнэ Иисусос тэ уджял лэнгирэ гавэстыр. Пал дова Иисусо бэстя дэ лодка, а мануш савэстыр выгинэ бэнга, мангья Иисусос тэ джял пал Лэстэ.
Нэ Иисусо пхэндя лэскэ: «Нат, Мэ камам, соб ту тэ джяс кхэрэ и тэ роспхэнэс сарєнгє пал дова, со кэрдя туса Дэвэл. Роспхэн со Дэвэл здыкхьяпэ пэ тутэ».
Мануш гия и роспхэнэл сарэнгэ со кэрдя ваш лэскэ Иисусо. И кон шунэлас лэс дова дрыван сыс дивтндэпэ.
Тэнче Иисусо пирэтрадыя пэ авир брэго рэка. Сыр Ёв явья одорик, кэ Ёв скэдынэпэ дрыван бут мануша. Манушэн сыс дрыван бут со тасавэнаспэ паш Лэстэ. Одой сыс джювлы, савьятэ 12 бэрш джялас рат. Ёй отдыя сарэ пэскирэ ловэ соб тэ авэл састы, нэ ни екх мануш на дыя лакэ састыпэн, и ёй дрывандыр насвалёлас.
Ёй шундя, со Иисусо састякирєл бутэн насвалэн манушэн, и подуминдя дэ пэстэ: Мэ патяв со сыр лавапэ пал Иисусоскири идя то авава састы! Пал дова ёй потгия ко Иисусо палал и лыяпэ пал Лэскири идя. Сыр ёй лыяпэ пал Лэстэ, рат пирьячья тэ джял.
Тэнче Иисусо шундя, сыр Лэстыр выгия зор. Ёв обрисия и пучя: «Кон лыяпэ пал мандэ?» Сыклякирдє ракирнас: Паш Тутэ дрыван бут манушэн, сарэ пал Тутэ лэнпэ. Соскэ Ту пучэс: «Кон лыяпэ пал Тутэ?»
Тэнче джювлы пэя по чанга ангил Иисусостэ и, дэ дар роспхэндя Лэскэ пал дова со ёй кэрдя и сыр кэрдяпэ састы. Иисусо пхэндя лакэ: «Тэро патябэн састякирдя тут. Джя Дэвлэса».
Библейско история Еванглия Матфеёстыр 8:28-34; 9:20-22, Маркостыр 5:1-20; 5:24б-34 и Еванглия Лукастыр 8:26-39; 8:42б-48