3.1 KiB
30. Иисусо чалякирдя панчь барья манушэн
Иисусо бичядя Пэскирэн апостолэн пир сарэ гава, соб ёнэ тэ роспхэнэн и тэ сыклякирэн манушэн пал Дэвлытко Царство. Сыр апостолы рисинэ одорик, кай исыс Иисусо, ёнэ роспхэндэ Лэскэ саро, со кэрдэ. Иисусо пхэндя лэнгэ тэ уджян пэ лодка Лэса до штэто кай никонэс нанэ, соб тэ откхинён. Ёнэ бэшнэ дэ лодка и угинэ пэ авир риг.
Бут мануша дыкхнэ, сыр Иисусо и Лэскирэ сыклякирдэ угинэ пэ лодка. Адалэ мануша прастандынэ пиро дром пашэ рэка, соб тэ явэн пэ авир брэго сыгэдыр Иисусостыр. Сыр Иисусо и лэскирэ сыклякирдэ докэдынэпэ ко брэго, лэн дужакирэнас бут мануша.
Манушэн сыс варикай 5 000, тэ нагинэ джювлен и чаворэ. Иисусостэ задукхандыя ило пал далэндэ манушэндэ. Со ёнё сыс сыр бакрорэ би хуласко. Пал дава Ёв лыя лэн тэ сыклякирэл бут пал со и тэдэ састыпэн долэнгэ, кон сыс насвало.
Бэвэляко склякирдэ пхэндэ Иисусоскэ: «Ужэ бэвэль. Одмэк манушэн, соб ёнэ тэ джян до гав и тэ кинэн пэскэ тэ ха».
Нэ Иисусо пхэндя сыклякирдэнгэ: «Тумэ дэнте лэнгэ тэха!» Сыклякирдэ пхэндэ: «Сыр амэ адава тэ кэрас? Кэ амэ сын панчь марэ и дуй нанэ барэ мачёрэ».
Тэнче Иисусо пхэндя пэскирэнгэ сыклякирдэнгэ тэ пхэнэн манушэнгэ, соб ёнэ тэ бэшэн пэ чар по панчьдеша мануша.
Тэнче Иисусо лыя панч марэ и дуй мачэ, подыкхья до болыбэн и пхэндя наис Дэвлэскэ пал хабэн.
Тэнче Иисусо розпхагирдя маро и мачё пэ котыра. Ёв далэ котыра дыя сыклякирдэнгэ, соб ёнэ тэ роздэн манушэнгэ. Сыклякирдэ роздэнас хабэн, и хабэн на пирьячёлас тэ авэл! Лэс вхтылдя сарэнгэ манушэнгэ, сарэ чалынэ, и ачапэ.
Тэнче сыклякирдэ скэдынэ хабэн саво ачапэ и скэдынэ 12 корзины. Саро адава хабэн кэрдяпэ пандже марэндыр и дуе мачэндыр ада сыс чуду.
Библейско история из Еванглия Матфеёстыр 14:13-21, Еванглия Маркостыр 6:31-44, Евангелия Лукастыр 9:10-17 и Еванглия Иоанностыр 6:5-15