6.2 KiB
20. рисён палэ пленостыр
Сарэ дуй царствы, Израилё и Иудея, кэрэнас бэзэх ангил Дэвлэстэ, Ёнэ на дживэнас пир завето, саво Дэвэл скэрдя лэнса пэ бэрга Синай, Дэвэл нанэ екхвар бичявэлас пророкэн, соб мануша тэ порисён кэ Ёв и тэ поклонинэнпэ Лэскэ, нэ ёнэ накамнэ тэ шунэн Дэвлэс.
Пал дава со ёнэ накандэнас, Дэвэл домэкэлас бида дэ сарэ дуй царствы, враги умарэнас лэн. Дэ долэ дэвэса сыс зоралы Ассирия. Ассирийцы дрыван нанэ куч обджянаспэ авирэ манушэнса. Ёнэ гинэ пэ Израилё и лынэ адаво царство. Ассирийцы умардэ бутэн манушэн до царство Израильско, залынэ саро со дрого и схачкирдэ бутыр пашэстыр форы.
И залынэ ассирийцы сарэн шералэн, сарэн кон джинэлас саро тэ кэрэ, и дякэ ж барвалэн манушэн улыджинэ дэ Ассирия. До Израилё ачнэпэ дрыван чёрорэ мануша.
Тэнче ассирийцы бичадэ тэ дживэн пэ пхув, кай сыс царство Израилёско, авирэн манушэн. Адала мануша скэрдэ розмардэ форы. Ёнэ кэрэнас бьява одолэнца кон ачапэ дэ Израилё. Родо Израильтянэнго, савэ кэрэнас сэмьи авирэ манушэнса, кхарэнаспэ самаритянэнса.
Мануша Иудейска дыкхнэ, сыр Дэвэл марэлас манушэн Израильсконэн пал дова со ёнэ на патянас и на кандэнас Лэс. Нэ ёнэ всаек поклонинэнаспэ идалоскэ и дэвлэнгэ хананеенгирэнгэ. Дэвэл бичявэлас пророкэн, соб тэ заракхэ лэн, нэ ёнэ отпхэнэнаспэ тэ шунэн.
Варикай прогия 100 бэрш, сыр ассирийцы розмардэ Израилё, Дэвэл бичядя пэ Иудея вавилонсконэс царёс Навуходоносорос. Дэ дола дэвэса Вавилоно сыс зорало форо. Царёскэ Иудеи пригияпэ тэ явэ слугаса ко Навуходоносоро и сарэ бэрша тэ покинэ лэскэ ловэ.
Прогия варикицы бэрш и царё Иудеиско гадыяпэ пэ Вавилоно. Тэнче вавилоняне рисинэ и чурдынэпэ пэ Иудея. Ёнэ закэдынэ Иерусалимо, розмардэ Дэвлэско Кхэр и улыджинэ саро барвалыпэн фороскиро и дэвлэскирэ Кхэрэско.
Пал дава со Иудея гадыяпэ по Навуходоносоростэ то лэскирэ мануша умардэ царёскирэн чавэн лэстэ по якха, а тэнче вылынэ лэскэ якха. Ёнэ улыджинэ царёс до Вавилоно, кай ёв и мэя до бэшибэн.
Навуходоносоро и лэскирэ мануша улыджинэ до Вавилоно гин сарэн манушэн Иудеи, а ачкирдэ екхэн чорорэн манушэн соб ёнэ тэ обкэрэн пхув.Долэ дэвэса, сыр Дэвлытконэнгэ манушэнгэ прыгияпэ тэ дживэн дур одолэ пхувьятыр кай Ракирэлас Дэвэл, кхарэлпэ Вавилонско плено.
Надык пэ дова, со Дэвэл домэкья Пэскирэн манушэн тэулыджя до плено пало бэзэха, Ёв всаек на бистрэлас Пэскирэн манушэн и рипирэлас со Ёв лэнгэ ракирдя. Дэвэл и дурэдыр дыкхэлас пал Пэскирэ манушэндэ и ракирэлас кэ ёнэ Пэскирэнса пророкэнса. Дэвэл пхэндя, со проджяла 70 бэрш и израильтяне рисёна палэ дэ Пхув сави Ракирдя Дэвэл.
Варикай прогия 70 бэрш и Киро, царё Пэрсийско, розмардя Вавилоно. Кана нанэ Вавилонско импэрия, а Персидско империя сыс хуласа бутэ манушэнгэ. Дэ долэ дэвэса израильтянэн лынэ тэ кхарэн иудеянэнса. Бут кон лэндыр саро джюипэн проджиндя до Вавилоно. Ачнэпэ набут пуранэ иудеи, савэ рипирэнас пэскири пхув.
Персидско царство сыс зороло, персы нанэ захалэс отлыджянаспэ кэ кандунэ мануша. Сыгэс пал дова сыр Киро атча царёса дэ Персия, и ёв пхэндя пэскиро лав, саво на запхэнэлас тэ отмэкэ сарэн иудеен савэ камэнас тэ уджян Пэрсиятыр и тэ рисён дэ пэскири пхув дэ Иудея. И ёв дыя лэнгэ саро со трэби, соб ёнэ тэ скэрэн розмардо Кхэр Дэвлэско!Дякэ Прогия 70 бэрш дэ плено и нанэ бут мануша рисинэ до форо Иерусалимо.
Сыр мануша явнэ до Иерусалимо, ёнэ докэрдэ Кхэр Дэвлэско и гадынэ стены до форо. Хулаенса сыс пэрсы, нэ иудеи дживэнас пэ Пхув сави Ракирдя Дэвэл и поклонинэнаспэ Дэвлэскэ до Кхэр Лэско.
Библейско история с 4 Царств 17; 24-25; 2 Паралипоменон 36; Ездры 1-10; Неемии1-13