8.8 KiB
19. Пророки
Дэвэл нанэ екхвар бичявэлас израильтянэнгэ пророкэн. Пророки шунэнас лава Дэвлэскирэ и пиридэнас лэн манушэнгэ.
Сыр до Израилё сыс хулай Ахаво, до Израилё дживэлас пророко Илия. Ахаво сыс нанэ лачо мануш. Ёв прыкхарэлас манушэн тэ поклонинэнпэ нанэ чачунэ дэвлэскэ савэс кхарэнас Ваало. Илия пхэндя Ахавоскэ: «пал дава со поклонинэнпэ идалоскє дэ Израилё на авэла брышинд, ни роса, кє дова дєвєс сыр мэ припхэнава, соб тэ джял брышинд». Шундя дава Ахаво дякэ росхолясыя пэ лэстэ, со камья тэ умарэл лэс.
Тэнче Дэвэл пхэндя Илииаскэ тэ джял до штэто саво дэ пустыня и тэ гаравэлпэ Ахавостыр. Илия гия ко паны кай насыс манушэн, карик лэс яндя Дэвэл. Дывэсэса и бэвэле вороны янэнас Илияскэ маро и мас. Дэ дола дэвэса Ахаво и лэскирэ мануша родэнас Илияс, нэ на попэнэ лэс.
Сыго паны вышутия, пал дова со на сыс брышинд. Тэнче Илия пир лав Дэвлэско гия до авир форо. Одой дживэлас екх чёрори манушны би ромэско чавэса. Лэндэ гин насыс со тэха, пал дова со до форы на сыс урожаё. Нэ ёнэ дынэ тэха лэскэ и саро со трэби, и Дэвэл дэлас лэнгэ тэха: яржо и ксил на выджялас лэнгирэстыр кхэрэстыр, поки Дэвэл на бичядя брышинд пэ пхув. Пэ дава надыкх со саро зашутия и до форы на сыс со тэха, а лэндэ всаек сыс хабэн. Дякэ сыс варикай трин бэрш.
И пхэндя Дэвэл Илияскэ, со Ёв бичявэла брышинд. Дэвэл припхэндя Илиаскэ тэ рисёл до Израилё и тэ джял ко Ахаво. Илия явья ко царё. Удыкхья лэс, царё Ахаво пхэндя: «А гэна и ёв, пал конэстэ бида до Израилё» Илия лэскэ пхэндя: «Ада тутыр бида до Израилё! Ту ачкирдян Яхвэ, чачунэс Дэвлэс, и поклонинэспэ Ваалоскэ. Скэдэ пэ бэрга Кармил сарэн кон дживэл до Израилё и пророкэн хоханэ дэвлэндыр!»
Ахаво дякэ и кэрдя. Сарэ кон дживэлас до Израилё скэдыя пэ бэрга Кармил. Явнэ мануша, савэ ракирэнас лавєстыр Ваалоскирєстыр. Ада сыс пророки Ваалоскирэ. Илия пхэндя манушэнгэ: «Бут тумэ авэна тэ выкэдэн? Сыр Яхвэ — Дэвэл, то поклонинэнпэ Яхвэ! А сыр Ваало — дэвэл, то поклонинэнпэ Ваалоскэ!»
Тэнче Илия пхэндя пророкэнгэ Ваала: «зачинэньтэ гурувэс, розчинэньтэ лэс по котыра и чивэн по жертвеннико, нэ яг на захачкирэньте. Тэнче и мэ кэрава дякэ, и чивава ското по жертвеннико ваш Дэвлэскэ. Одова Дэвэл, Саво бичявэла яг по жертвеннико, и сын чачуно Дэвэл». Прорроки Ваала кэрдэ жертва, нэ яг на захачкирдэ.
Тэнче ёнэ лынэ тэ мангэнпэ пэскирэ дэвлэскэ: «Пошун амэн о Ваало!» Саро дэвэс ёнэ мангэнаспэ, годлэнас и чинэнас пэс чурьенса, нэ Ваало лэн на шунэлас и яг на бичявэлас.
Пророки Ваала мангэнаспэ гин саро дывэс. Кэ бэлвэль ёнэ пирьячнэ тэ мангэнпэ. Тэнче Илия чидя скотина пэ жертвеннико ваш Дэвлэскэ. Ёв припхэндя манушэнгэ тэ чивэн дэшудуй вэдры паны пэ жертва, тэ авэл мас, кашта и пху пашэ жертвеннико киндэ.
Тэнче Илия помангьяпэ: «О Яхвэ, Дэвэл Авраамоско, Исаакоско и Иаковоско! Сыкав амэнгэ дадэвэс, со Ту — Дэвэл Израилёско, а мэ — Тэро слуга. Пхэн мангэ, и мэк сарэ мануша уджинэна, со Ту — чачуно Дэвэл».
И сгия болыбнастыр яг и схачия мас, кашта, бара и паны пашэ жертвеннико. Сыр мануша удыкхнэ адава, ёнэ пэнэ пэ пхув и загодлынэ: «Яхвэ — чачуно Дэвэл! Яхвэ — чачуно Дэвэл!»
Тэнче Илия пхэндя: «На дэнте ни екхэскэ пророкоскэ Ваала тэ нашэ!» Мануша вхтылдэ пророкэн Ваала, улыджинэ одотхыр и умардэ.
Тэнче Илия пхэндя царёскэ Ахавонэскэ: «Сыгэдыр рисёв кхэрэ, пал дова со авэла брышинд». Сыг болыбэн покалыя и гия баро брышинд, пал дова со пир лав Яхвэ шукипэн пирьячья. Ада сыс соб мануша тэ дыкхэн, со Ёв сын чачуно Дэвэл.
Сыр Илия докэрдя пэскири буты пэ пхув, Дэвэл выкэдыя Пэскэ пророкос манушэс савэс кхарэн Елисеё. Дэвэл сыкавэлас Пэскири зор пир Елисеёстэ. Екхвар Дэвэл сыкадя пэски зор пэ Нееманостэ, ёв сыс баро рай пэ врагэнгири риг. Ко Неемано сыс дрыван насвалы цыпа. Шундя пал Елисеёстэ, Неемано гия кэ ёв и помангья лэс тэ састякирэл. Нэ Елисеё на выгия кэ ёв, а перепхэндя пескирэ манушэса, соб Неемано тэ морэлпэ дэ рэка Иордано эфта молы.
Неемано росхолясыя и на закамья тэ кэрэл адава пал дова, со Елисеё на выгия кэ ёв. Нэ тэнче ёв пэрэкамья, и гия кэ рэка Иордано и эфта молы мордяпэ до паны. Сыр ёв выгия панэстыр, Дэвэл састякирдя лэс.
Пал Елисеёстэ Дэвэл бичявэлас манушэнгэ Израиля бут авирэн пророкэн. Сарэ ёнэ ракирэнас манушэнгэ, соб одолэ тэ пирьячен тэ поклонинэпэ идалоскэ и кэ мануша тэ отлыджянпэ патывалэс. Пророки ракирэнас манушэнгэ, со сыр ёнэ на пирьячена тэ кэрэн холы и на лэна тэ кандэн Дэвлэс, то Дэвэл лэла тэ сэндякирэл и тэ марэл лэн пал лэнги банг.
Нэ мануша на шунэнас Дэвлэс. И бут молы отлыджянаспэ ко пророки нанэ куч. Дякэ, сыр екхэс пророкос савэс кхарэнас Иеремия чидэ дэ шуки ганынг и ачкирдэ одой лэс тэ мэрэл. Ёв бэшелас дэ ганынг дэ блата, нэ царё припхэндя пэскирэ бутярнэнгэ тэ вытырдэн лэс, сыр ёв сыс джидо. Мануша накамэнас Дэвлытконэн пророкэн а савэн и умарэнас.
Надыкхэнас пэ дая холы, пророки всаек передэнас манушэнгэ лава Дэвлэскирэ. Ёнэ ракирэнас манушэнгэ, со Дэвэл хаскирэла лэн, сыр ёнэ на порисёна ко Дэвэл, и прикхарэнас манушэн тэ шунэн Дэвлэс. Дякэ ж пророки ракирэнас манушэнгэ, Дэвэл ракирдя со бичявэла Мессияс.
Библейско история из 3 Царств 16-18; 4 Царств 5; Иеремии 38