5.3 KiB
18. Дэвэл розчиндя царсво по дуй котыра.
Давидо сыс царёса 40 бэрш. Сыр ёв мэя дэ Израилё атча хулай лэскиро чаво Соломоно. Дэвэл пучя кэ Соломоно, со ту камэс бутыр сарэстыр. Соломоно мангья кэ Дэвэл тэ дэл лэскэ годы, соб ёв тэ авэл годявир хулай манушэнгэ. Дава чалыя Дэвлэскэ, Ёв кэрдя со Соломоно сыс годьварэдыр мануш сарэндэр по свэто. Дэвэл кэрдя Соломонос годявирэса хуласа, и Дэвэл кэрдя лэс дрыван барвалэса.
Дэ Иерусалимо Соломоно скэрдя Кхэр Дэвлэско, саво камня тэ кэрэл лэскиро дад Давидо. Сыр Давидо сыс джидо то ёв скэдыя саро со сыс трэби соб тэ скэрэ Дэвлэско Кхэр. Кана мануша поклонинэнпэ Дэвлэскэ и янэнас Лэскэ жертвы до Кхэр, а нанэ дэ Шатра кай скэдэнаспэ. Дэвэл сыс до Кхэр пэскирэ манушэнса.
Соломоно и сыс годявир, нэ ёв на кандыя Дэвлэс, и лыя тэ лэл пал пэстэ ромнэн авирэ родостыр, савэнса Дэвэл пхэндя тэ накэрэ бьява. Бут джювля яндэ пэса пэскирэн дэвлэн и поклонинэнаспэ лэнгэ. А сыр Соломоно пхурия, ёв лыя тэ поклонинэпэ лэнгирэ дэвлэнгэ.
Пал дава Дэвэл холясыя пэ Соломоностэ и пхэндя, со Ёв розчурдэла израильсконэн манушэн пэ дуй царствы. И кэрлапэ када сыр мэрэла Соломоно.
Сыр Соломоно мэя, то царёса тэрдыя лэскиро чаво Ровоамо. Сарэ Израильска мануша скэдынэпэ кэтанэ, соб тэ приджинэ лэс царёса. Мануша пхэндэ Ровоамоскэ, со ёнэ кэрэнас пхари буты ко Соломоно и покинэнас лэскэ бут ловэ. Ёнэ помангнэ Ровоамос тэ на дэл лэнгэ пхари буты.
Нэ Ровоамо пхэндя лэнгэ: «Тумэ ракирэн, со кэ миро дад Соломоно тумэ кэрэнас пхари буты. А кэ мэ тумэ лэна тэ кэрэн бутыр и пхарэдыр буты, сыр кэ миро дад!»
Сыр шундэ мануша адала лава, бут лэндыр гадынэпэ пэ Ровоамостэ. Дэш роды Израилёскирэ на закамнэ тэ прылэн лэскиро лав и тэ прылэн лэс пэскирэ царёса. Ровоамоса ачнэпэ дуй роды, савэ лынэ тэ кхарэпэ царство Иудоско или Иудейско.
Авир дэш роды выкэдынэ пэскэ царёса манушэс савэс кхарэн Иеровоамо, адалэ дэш роды дживэнас по северно риг свэто. Ёнэ лынэ тэ кхарэнпэ Царство Израилёско.
Царё Израилёско, Иеровоамо, сыс нанэ лачё царё. Ёв на кандэлас Дэвлэс и сыклякирэлас манушэн тэ дживэн до бэзэх. Иеровоамо чидя ваш пэскирэнгэ манушэнгэ дуй идалы, и мануша бутыр на пхирэнас до Иерусалимо, саво сыс пэ пхув Иудейско, и на поклонинэнаспэ Дэвлэскэ дэ Лэско Кхэр.
Иудея и Израилё кошэнаспэ бут молы и марэнаспэ машкир пэстэ.
Дэ нэво царство Израилёско сарэ цари сыс нанэ лачэ хулая. Бут лэндыр сыс умардэ авирэнса израильтянэнса, савэ камнэ тэ тэрдё пэ лэнгиро штэто сыр цари.
Сарэ цари и бут мануша савэ дживэнас до царство Израиля поклонинэнаспэ идалоскэ. Лэнгиро поклонения сыс дэ бэзэх, а сыс дасаво со янэнас чаворэн дэ жертва идалоскэ.
Царья Иудейска сыс родостыр Давидоскирэстыр. Бут кон адалэ манущэндыр сыс лаче царья, сыс чачунэ хулая и поклонинэнаспэ Дэвлэскэ. Нэ бутыр царен Иудеи сыс нанэ лачэ хулая и поклонинэнаспэ идалоскэ. Койсавэ адалэ царендыр янэнас пэскирэн чаворэн дэ жертва хоханэ дэвлэнгэ. Бут манушэн савэ дживэн дэ Иудэя поклонинэнаспэ авирэнгэ дэвлэнгэ, адалэса ёнэ гадэнаспэ пэ Дэвлэстэ.
Библейско история с 3 Царств 1-6; 11-12