8.4 KiB
17. Завето Дэвлэско Давидоса
Перво царё сыс до Израилё Сауло. Ёв сыс вучё гожо и чалёлас манушэнгэ. Перва бэрша Сауло сыс лачё царё до Израилё. Нэ дурэдыр ёв кэрдяпэ захало и пирьячья тэ шунэл Дэвлэс. Пал дава Дэвэл выкэдыя авирэс манушэс царёса пэ лэско штэто.
Дэвэл выкэдыя тэрнэс муршэс Израилёстыр савэс кхарэнас Давид, и Ёв кэрдя саро соб ёв тэ авэл царёса пал Саулостэ. Давидо сыс пастухо форостыр Вифлеемо. Сыр ёв ракхэлас бакрэн дадэскирэн, лэскэ прыджяласпэ тэ умарэ и львос и медвидёс, савэ чурдэнаспэ пэ бакрэндэ. Давидо сыс патывало и чачуно мануш. Ёв патялас Дэвлэскэ и кандэлас Лэс.
Сыр Давидо сыс тэрно, ёв мардяпэ дрыван барэса манушэса савэс кхарэн Голиафо. Ёв сыс зороло и джиндя сыр трэби тэ марэпэ, вучипэн лэско сыс гин трин метры! Нэ Дэвэл дыя Давидоскэ тэ умарэ Голиафос и тэ заракхэ Израилё. Тэнче Давидо бут молы выкхэлэлас марибэн врагэндыр Израиля. Ёв лыя куч тэ марэпэ и бут молы лыджялас манушэн Израиля тэ до марибэн врагэнса. Давидо чалёлас израильтянэнгэ, и ёнэ шарэнас лэс.
Мануша дякэ камнэ Давидос, со Саулос када захалас и ёв дарэлас со Давидо тордёла пэ лэско штэто. Тэнче Сауло закамья тэ умарэ лэс, и Давидо настя дэ пустыня, гаравэласпэ Саулостыр и лэскирэ манушэндыр. Екхвар Сауло Пэскирэ манушэнса родэлас Давидос. Ёв загия дэ пещера кай гаравэласпэ Давидо, нэ ёв на удыкхья лэс. Давидо подгия кэ ёв палал и отчиндя лэскирэ идятыр наборо котыр. Сыр, Сауло отгия пещератыр, Давидо загодлыя Саулоскэ и сыкадя лэскэ котыр саво лэстэ сыс до васта. Дякэ Сауло полыя, со Давидо, на умардя лэс, ваш дова соб тэавэ царёса,нэ дава сыс дэ лэскирэ васта.
Прогия набут дэвэса и Сауло хасия до марибэн, а Давидо тэрдыя царёса Израиля. Дэвэл благословил Давидос дэ саро со ёв кэрэлас. Ёв сыс лачэ царё, и манушэнгэ ёв чалёлас. Давидо марэласпэ бут молы, и Дэвэл дэлас лэскэ тэ выкхэлэ кэ враги Израилёскирэ. Ёв марэласпэ пало Иерусалимо и кэрдя лэс барэса фороса, дэ саво ёв дживэлас и исыс хуласа пэ дая пхув. Давидо сыс царёса 40 бэрш.Пало бэрша дэ савэ ёв сыс хулай до Израилё, Израилё атча зорало и барвало.
Давидо камья тэ кэрэл кхэр ваш Дэвлэскэ, кай сарэ израильтяне тэ поклонинэнпэ Дэвлэскэ и тэ янэн Лэскэ жертвы. Кэ дава, 400 бэрш, мануша поклонинэнаспэ Дэвлэскэ и янэнас Лэскэ жертвы дэ Шатра кай скэдэнпэ, сави скэрдя Моисеё.
Дэ дола дэвэса дживэлас екх пророко савэс кхарэнас Нафано. Дэвэл бичядя лэс кэ Давидо дасавэнса лавэнса: «Ту на кэрэса Дэвлэскэ Кхэр ваш Мангэ, пал дова со ту бут молы сыс до марибэн. Лэс кэрэла тэро чаво. Нэ Мэ тукэ дава бут саро. Екх тырэ родостыр авэла вечно хулай Мирэ манушэнгэ!» Екх родостыр Довидоскирэстыр, саво авэла вечно хулай. — ада Мессия. Мессия — ада Выкэдыно Дэвлэса. Саво заракхэла манушэн сарэ свэтостыр лэнгирэ бэзэхэндэр.
Сыр Давидо шундя лава Нафаноскирэ, ёв пхэндя Дэвлэскэ наис и прославиндя Лэс пал дова, со Ёв дыя Давидоскэ бари патыв и дыя лэскэ бут благословения. Давидо на джиндя, дэ савэ бэрша Дэвэл кэрэла со пхэндя. Нэ,амэ джинас, со израильтянэнгэ трэби сыс бут тэ дужакирэн сыр явэла Мессия — гин 1000 бэрш.
Давидо бут бэрша чачунэс лыджялас пэскирэн мануша. Ёв кандэлас Дэвлэс, и Дэвэл благословлял лэс. Нэ тэнче Давидо кэрдя баро бэзэх ангил Дэвлэстэ.
Екхвар Давидо поддыкхья пэскирэ дворостыр и удыкхья гожона джювля, сави морэласпэ. Ёв на джиндя ла, нэ пуча пал латэ кэ пэскирэ бутярнэ, и лэскэ пхэндэ, со ла кхарэн Вирсавия.
Давидо на отрисия латыр, а бичядя пал латэ бутярнэн. Ёв пирисутя ласа, и отбичядя ла кхэрэ, прогинэ дэвэса и Вирсавия пиридыя Давидоскэ, со ёй пхари.
Вирсавия сыс палором пал манушэстэ савэс кхарэн Урия. Ёв сыс хвэдыр машкир манушэндэ савэ марэнпэ ко Давидо. Дэ дола дэвэса Урия марэласпэ до марибэн. Давидо кхардя Уриёс марибнастыр и припхэндя лэскэ тэ джял кэ пэскири ромны. Нэ Урия отпхэндяпэ тэджя кхэрэ тэ пасёл,дякэ сыр авирта мануша марэнпэ до марибэн. Тэнче Давидо бичядя лэс палэ по марибэн и припхэндя барэдырэ манушэскэ, соб лэс тэ чивэн одорик, кай марэнпэ дрыванэдыр сарэстыр, соб Урия тэ мэрэл. Дякэ и исыс: Урия мэя дэ марибэн.
Сыр Урия мэя. Давидо лыя пал пэстэ Вирсавия. Ёй бияндя лэскэ чавэс. Дэвэл дрыван холясыя пэ Давидостэ пал дава со ёв кэрдя. Ёв бичядя ко Давидо пророкос Нафанос, соб ёв тэ пхэнэл лэскэ, саво баро лэско бэзэх. Давидо мангъяпэ ко Дэвэл, пал пэскиро бэзэх, и Дэвэл простиндя лэс. Тэнче Давидо саро джюипэн джялас пал Дэвлэстэ и кандэлас Лэс, и сыр сыс кэ ёв пхарэ дэвэса, ёв всаек патялас Дэвлэскэ.
Нэ чаво Давидоско мэя тыкнэса. Дякэ Дэвэл мардя Давидос. Пэ Давидостэ гадынэпэ мануша лэскирэ семьятыр, и адава сыс саро лэскиро джюипэн. Лэскири власть хаскирдя зор. Хоч Давидо накандыя Дэвлэс, нэ Дэвэл ачапэ чачуно и кэрэлас одова со пхэндя Давидоскэ. Тэнче кэ Давидо и Вирсавия бияндяпэ екх чаво, ёнэ кхардэ лэс Соломоно.
Библейско история с 1 Царств 10; 15-19; 24; 31; 2 Царств 5; 7; 11-12