5.3 KiB
12. Мануша выджян Египтостыр
Израильтяне лошаса выгинэ Египтостыр. Ёнэ бутыр на сыс бутярнэ до Египто. Ёнэ джянас кэ пхув, пал сави ракирэлас лэнгэ Дэвэл! Египтяне дынэ израильтянэнгэ саро, со ёнэ мангнэ, сунакай, и руп и саро, со дрого. Мануша авиртонэ родостыр патяндынэ дэ Дэвлэстэ и выгинэ лэнса Египтостыр.
Дэвэл джял ангил лэндэ дэвэсэ сыр облако, а ратяко джял сыр ягатыр столбо. Дэвэл сыс лэнса и сыкавэлас лэнгэ дром. Манушэнгэ трэби сыс тэ кандэн Дэвлэс и тэ джян пал Лэстэ.
Прогинэ нанэ бут дэвэса фораоно и лэскирэ манушэнса парудэ пэскиро лав. Лэнгэ закамьяпэ, соб израильтяне тэ авэн бутярнэнсэ и ёнэ чурдынэпэ лэн тэрэсэн.Дэвэл кэрдя фораонэскиро ило баруно, соб мануша тэ дыкхэн, со Ёв - екх чачуно Дэвэл. И соб мануша тэ полэн, со Лэскиро лав - Яхвэ, и со Ёв зоралэдыр фараоностыр и сарэндыр дэвлэндыр.
Тэнче фараоно и лэскирэ мануша традынэ пал израильнянэндэ, соб тэ кэрэ лэн пэскирэнса бутярнэнса. Сыр израильтяне удыкхнэ савэ джян пэлэндэ мануша фараоноскирэ, ёнэ полынэ, со лэнгэ нанэ карик тэ нашэн и лэн лэна мануша фараоноскирэ,долэскэ со ангил исыс Лоло морё. Ёнэ дрыван передарандынэ и загодлынэ: «Хвэдыр амэ тэ кэрас буты пэ египтянэндэ, а нанэ тэ мэрас дэ пустыня!»
Моисеё пхэндя израильтянэнгэ: «Пирачен тэ дарэн! Дадэвэс Дэвэл лэла тэ марэлпэ пал ту мэндэ и заракхэла тумэн». Тэнче Дэвэл пхэндя Моисеёско: «Пхэн манушэнгэ, мэк джян кэ Лоло морё».
Тэнче Дэвэл перечудя облачно столбо, и чидя лэс машкирал израильтянэндэ и египтянендэ, ратяко адава столбо хачёлас соб египтяне тэ наподжян кэ израильтяне.
Дэвэл пхэндя Моисеёскэ тэ гадэл васта ангил морё. Моисеё гадыя васта, и Дэвэл бичядя бавал, сави розлыджия паны до морё пир рига, дякэ со лыяпэ дром тэ переджя морё.
Израильтяне прогинэ морё пир шуки пхув, а пир дуй рига паны исыс тэрдо стенаса.
И египтяне удыкхнэ, сыр израильтяне нашэнас лэндэр. Египтяне закамнэ тэ праста пал лэндэ.
Ёнэ гинэ палал пал израильтянэндэ пир дром пир морё. Дэвэл кэрдя со египтяне передарандынэ. Ёв кэрдя дякэ со лэнгирэ вурда бэшнэ дэ блата. Ёнэ загодлынэ: «Нашас!Кокоро Дэвэл марэлпэ пал израильтянэндэ!»
Сыр сарэ израильтяне перегинэ морё по авир риг састэ и зоралэ, Дэвэл пхэндя Моисеёскэ тэ гадэл васта по паны. Моисеё дякэ и кэрдя, паны рисия по пэскиро штэто и пэя пэ египтянендэ. Сарэ фараоноскирэ мануша тасадынэ до паны.
И сыр израильтяне удыкхнэ, со египтяне похасинэ, ёнэ патяндынэ Дэвлэскэ и приджиндэ, со Моисеё — Дэвлэскиро пророко.
Израильтяне сыс дрыван лошалэ, со Дэвэл очядя лэн джидэнса и на рисинэ ёнэ палэ до бутярнэ пэ буты кэ фараоно. Кана ёнэ кандэнас Дэвлэс и ваш Лэскэ дживэнас пэ воля! Израильтяне багэнас бут гиля, лошалэ и прославляли Дэвлэс пал дова, со Ёв заракхья лэн фараоноскирэндыр манушэндыр.
Дэвэл припхэндя израильтянэнгэ соб ёнэ тэ рипирэн адава дэвэс кай Ёв заракхья лэн египтянендыр и дыя лэнгэ воля. Адава свэнко кхардэ Патради. Пэ адава свэнко Патради израильтяне зачинэн бакрорэс би дошако и хан лэс марэса, саво пэкло би дрожденго.
Библейско история сыр Выджянас 12: 33-15: 21