4.3 KiB
9. Дэвэл прыкхарэл Моисеёс.
Сыр мэя Иосифо саро лэскиро родо ачапэ до Египто. Ёнэ и саро лэнгиро родо дживэнас одой бут бэрша и лэндэ сыс бут чаворэн. Лэн прокхарэнас израильтяне.
Израильтяне исыс бутярнэ кэ египтяне, и кэрэнас кхэра и форы. Джуипэн лэндэ кэрдяпэ дрыван пхаро. Нэ Дэвэл благословлял лэн, и лэндэ сыс бут чаворэн.
Фараоно удыкхья со лэндэ бияндён дрыван бут чаворэн. И тэнче ёв прыпхэндя пэскирэ манушэнгэ соб ёнэ тэ умарэн сарэн чаворэн савэ биянэнапэ кэ ёнэ, тэ чурдэн лэн дэ рэка Нил.
Дэ долэ дэвэса кэ екх израильтянка бияндыяпэ чаворо, и ёй гаравэлас лэс.
Сыр тэ гаравэ лэс на сыс кай, дай чудя лэс дэ корзина и очядя дэ чар пэ рэка Нил, соб тэзаракхэл тэнаумарэн лэс. Пхурэдыр пхэн чаворэски дыкхэлас пал лэстэ со авэла дурэдыр.
Тэнче чай фараоноскири явья кэ рэка, соб тэ морэлпэ. Ёй удыкхья корзина и подыкхья со дэ латэ машкирал. Удыкхья чаворэс, лакэ кэрдяпэ дор лэс. Пхурэдыр пхэн чаворэскири сави исыс одой, пхэндя лакэ соб ёй тэ лэл израильтянка кай тэ выдыкхэл лэс. И ёй лыя да манушня сави дэлас тэха чаворэскэ и на джиндя со ада лэскири дай. Сыр чаворо потбария дай рискирдя лэс кэ фараоноскири чай, и ёй кэрдя лэс пэскирэ чаворэса и дыя лэскэ лав Моисей.
Моисеё выбария. Екхвар ёв удыкхья, сыр египтянено марэл бутярнэс израильтянинос. Моисеё камья тэ заракхэл лэс пал дава, со ёв сыс израильтянино сыр ёв.
Подыкхья, со никонэс нанэ, Моисеё умардя египтяненос и за гарадя лэс дэ пхув. Нэ адава удыкхнэ мануша.
Пал одова со кэрдя Моисеё шундя кокоро фараоно. Ёв припхэндя тэ умарэ Моисеёс, нэ Моисеё унастя Египтостыр дэ пустыня. Фараоноскирэ мануша на попэнэ лэс одой.
Дэ пустыня дур Египтостыр, Моисею сыс пастухоса. Ёв лыя пэскэ ромня одолэ штэтэндыр, и лэндэ бияндынэ дуй чавэ.
Моисею ракхэлас бакрэн кэ пэскиро тестё. Екхвар ёв удыкхья екх набаро дэмбо саво хачёл и на схачёлас. Моисеё потгия кэ ёв тэ подыкхэл пэ лэстэ. Сыр ёв подгия пашэдыр, Дэвэл заракирдя кэ Моисеё: «Моисеё, слэ тэрах тэри! Ту тэрдо пэ свэнто пхув».
Моисеё пучя: «А сыр ёнэ закамэна тэ уджинэ, кон бичядя ман? Со мэ лэнгэ тэ пхэнав?» Дэвэл пхэндя: «МЭ ДОВА КОН МЭ СЫН. Пхэн лэнгэ: “ОДОВА, КОН, СИН, бичядя ман кэ тумэ”. Дякэ ж пхэн лэнгэ: “МЭ Яхвэ, Дэвэл тумарэ дадэнгиро — Авраамоско, Исаакоско и Иаковоско. Ада Миро лав пэ сарэ бэрша”».
Моисеё здарандыя и на камья тэ джял ко фараоно, пал дова, со на джинэлас куч тэ ракирэл. Пал адава Дэвэл бичядя лэскэ Ааронос Моисеёскирэс пшалэс.
Библейско история сыр Выджянас 1-4