4.7 KiB
5. Дэвэл пхэндя Аврамоскэ со дэла лэскэ чавэс
Тэнче, сыр Аврамо и Сара явнэ дэ Ханаано, прогия дэш бэрш, кэ ёнэ на сыс чаворэн. Тэнче Сара, ромны Аврамоски, пхэндя лэскэ: «Сыр Дэвэл надомэкья соб кэ мэ тэ авэн чаворэ, а мэ дрыван пураны, соб тэ биянав, гэна тукэ мири бутярны Агарь. Джя пасёв ласа, соб ёй тэ биянэл ваш мангэ чаворэс».
Аврамо дякэ и кэрдя. Агарь сыс пхари и запхутия ангил Саратэ. А Сара пхэнэл со банго дэ дава Аврамо. Явья дэвэс и Агарь бияндя чаворэс, и Аврамо дыя лэскэ лав Измаило. Сыр Измаилоскэ сыс дэшутрин бэрш, Дэвэл заракирдя кэ Аврамо.
Дэвэл пхэндя: «Мэ сын Дэвэл Саво саро кэрав. Мэ скэрава туса завето». Сыр шундя Аврамо Дэвлэс, то пасия муеса пэ пхув. Дэвэл ракирэл: «Ту авэса дадэса бутэнгэ манушэнгэ. Ту авэса хуласа пэ пхув Ханаан ту и тыро родо, и Мэ авава тумарэ Дэвлэса. Ту трэби тэ обчинэс кожнонэс чаворэс и кожнонэс муршэс дэ пэскири семья».
«Кэ тэри ромны Сара биянэлапэ чаво- ёв и авэла одолэ чавэса, пал савэстэ Мэ ракиравас тукэ. Дэ лэскэ лав Исаако. Лэса Мэ чивава Пэскиро завето, и лэстыр авэла баро родо, Измаилостыр Мэ тожэ кэрэва баро родо, нэ Миро завето авэла Исаакоса». Тэнче Дэвэл парудя лав «Аврам» пэ «Авраам», со ракирел «дад бутэнгэ манушэнгэ». Дэвэл дякє ж парудя лав «Сара» пэ «Сарра», со ракирэл «принцесса».
Дэ дова дэвэс Авраамо обчиндя сарэн чаворэн и сарэн муршэн дэ пэскиро кхэр. Варикай прогия бэрш, сыр Авраамоскэ сыс шел бэрш, а Сарракэ инядєша, ёй бияндя Авраамоскэ чавэс. Ёнэ дынэ лэскэ лав Исаако, сыр и пхэндя лэнгэ Дэвэл.
Сыр Исаако сыс тыкнэ чаворэса, Дэвэл закамья тэ уджинэ патябэн Авраамоскиро. Ёв пхэндя: «Лэ Исаакос, тырэс чавэс саво тутэ екх, и ян лэс дэ жертва Мангэ». Авраамо кандыя Дэвлэс и камья тэянэ дэ жертва пэскирэс чавэс.
Сыр Авраамо и Исаако джянас кэ штэто кай тэянэ жертва, Исаако пучя: «Дадо, амэндэ сын кашта соб тэянэ жертва, а кай бакроро?» Авраамо пхэндя: Чаворо, Дэвэл дэла бакрорэс ваш жертва».
Сыр ёнэ догинэ кэ штэто кай тэянэ жертва, Авраамо спхандя пэскирэс чавэс Исаакос и чудя лэс по жертвеннико. Ёв камья тэ зачинэл пэскирэс чавэс, нэ Дэвэл пхэндя лэскэ: «Тэрдёв! На зачин чаворэс! Кана Мэ джинав, со ту дарэс Мандыр, пал дова со ту камьян тэ умарэс тырэс чавэс важ Мангэ а ёв тутэ екх!»
И Авраамо удыкхья бакрэс, саво сыс паш лэндэ замардо дэ чар. Ада Дэвэл дыя лэнгэ кадалэс бакрэс, соб ёнэ тэ янэн лэс дэ жертва палэ Исаакостэ. Авраамо лошаса яндя бакрэс дэ жертва.
Тэнче Дэвэл пхэндя Авраамоскэ: «Пал дова, со ту камьян тэ отдэ Мангэ саро, и пэскирэс чавэс саво тутэ екх, Мэ пхэнав со благославлю тут! Тутэ авэла родо бутыр чэргэнендэр до болыбэн. Пал дова, со ту кандыян Ман, Мэ благославлю пал тутэ саро родо пэ свэто!»
Библейско история с Бытия 16-22