5.6 KiB
3. Дэвэл бичядя баро брышинд и пхув зачудя панеса
Прогнэ бут бэрша. Дэ свэто сыс бут манушэн. Ёнэ сыс дрыван захалэ, и лэндэ сыс барунэ илэ. Мануша дрыван кэрдэпэ хасютнэ, со Дэвэл пхэндя хаскирэла саро свэто, зачувэла лэс панэса.
Машкир сарэндэ манушэндэ Дэвэл сыс лошало екхэса Ноёса, пал дава со ёв пхирэлас ангил Дэвлэстэ, пашэ манушэндэ савэ дживэнас дэ бэзэх. Дэвэл розпхэндя лэскэ одова, со Ёв камэл тэкэрэл. Пхув тэ зачивэл барэ панеса, и пал дава Ноё трэби тэ скэрэл баро ковчего.
Адава дрыван баро каштуно ковчего трэби тэ авэл длунгипэн 140 метров, буглыпэн 23 метра и вучипэн 13,5 метров, до трин ярусы, бут отсеки, крышаса и вокнаса. Ноё, лэски семья и сарэ жывотна трэби тэ зракхэнпэ панестыр машкирал дэ адава ковчего.
Ноё кандыя Дэвлэс. Ёв пэскирэнса тринэ чавэнса Скэрдя ковчего дякэ сыр пхэндя лэскэ Дэвэл. Кэрэнас ковчего бут бэрша, пал дова со ёв исыс дрыван баро.
Дэвэл пхэндя Ноёскэ тэ лэл бут хабэн ваш пэскэ, пэскирэ семьякэ и животнонэнгэ. Сыр саро сыс кэрдо, Дэвэл пхэндя Ноёскэ, со явья дова дэвэс лэскэ, ромнякэ и тринэ чавэнгэ пэскирэ ромненса тэ заджян дэ ковчего, Лэн сарэн сыс охто манушэн.
Дэвэл пхэндя Ноёскэ тэ лэл пэса до ковчего кожнонэстыр животнонэнстыр муршэс и джювля и дякэ ж кожнонэ чириклятыр, соб ёнэ тэ зракхэнпэ барэ панестыр, и тэ лэл эфта муршэн и джювлен долэндыр животнонэндыр, савэн можно тэянэ дэ жертва. Сыр ёнэ сарэ загинэ дэ ковчего, Дэвэл Кокоро закэрдя пал лэндэ вудара.
Тэнче гия брышинд, саво на пирьячелас тэ джял саранда дэвэса и ратя! Брышинд джялас и джялас! и паны дякэж марэлас пхувьятыр. Саро дэ свэто учякирдяпэ панеса, дякэ ж сарэ вуче бэрги.
Сарэ мануша и жывотна, савэ дживэнас пэ пхув, похасинэ. Нэ сарэ, кон сыс машкирал до ковчего ачнэпэ джидэ и на хасинэ.
Сыр брышинд пирьячья ковчего сыс по паны панч чона.Паны лыя тэ уджял.Екхвар ковчего тэрдыя пэ вучипэн бэргако, нэ саро свэто сыс до паны.Пал трин чона долэскэ сыс душло вучипэн бэргытко.
Прогинэ саранда дэвэса, и Ноё вымэкья воронос, соб тэ полэ, на вышутия ли паны пэ пхув. Вороно родэлас шуки пхув и на попэя.
Тэнче Ноё вымэкья голумбос, и ёв на попэя пхув шуки и рисия палэ кэ Ноё. Прогия курко и Ноё вымэкья голумбос, и ёв рисия кашторэсапэ савэстэ сыс мурица маслина дэ муй! Паны уджялас, и пэ пхув гия тэ барьёл чар сыр и сыс.
Ноё подужакирдя курко и вымэкья голумбос дэ трито моло. Пэ адава моло голумбо попэя пэскэ штэто, кай тэ бэшэл, и на рисия палэ. Пхув вышутия!
Прогинэ дуй чёна, Дэвэл пхэндя Ноёскэ: «Кана ту пэскирэ сэмьяса и сарэса скотоса выджя ковчегостыр. Мэк тумэндэ авэла бияндёна бут чаворэ и внуки! Тэ авэл бут манушэн пэ пхув!» Тэнче Ноё семьяса выгия ковчегостыр.
Тэнче Ноё кэрдя жертвеннико и яндя дэ жертва разно скотина. сави можно тэянэ дэ жертва. Дэвэл сыс лошало адалэ жертваса и бичядя Ноёскэ и лэскирэ сэмьякэ бах.
Дякэ ж Дэвэл пхэндя Мэ дав лав со бутыр на хаскирава пхув пал дова со мануша кэрэн холы и назачивава пхув панеса, наподыкхава пэ дова со мануша кэрэн бэзэх тыкнэ бэршэндыр.
Соб тэ зрикирэл Пэскиро лав, Ёв кэрдя радуга. И пхэндя,сарэ молы сыр дро болыбэн авэла тэ сыкавэлпэ радуга, Ёв авэла тэ зрипирэл, со бутыр на лэла тэ зачивэ Пхув панеса.
Библейско история с Бытия 6-8