8.9 KiB
47. फिलिप्पीा नगर तु पौलुस रांग सिलास।
जब शाउल सु रोमि साम्राज्य तोलि ला खोरवा तेनि खोसु रांए रोमि मिन “पौलुस” ला फोरचा सुकपा। शाकचिक, पौलुस रांग खोए रोह सिलास फिलिप्पिए युल दु यीशु कि बारे ला शोततु फुताक खोशाक युल कि फिता रु लुगबि सुर कि ज़ा जिक रु फुताक ओए रु मिया मोलळम ज्ञकचा ला ज़ोमबा। ओति ना लुदिया मिन कि फोमु छोंग छोङान जिक वोका। खो कोंजोक ला ञिमु फेतका दुरुंग खोए मिहवा फितका।
कोजोक सु लुदिया ला यीशु कि बारे ला लोन ला दिन छियि छिला डाया ज़ोवा। पौलुस रांग सीलास सु लुदिया रांग खोए पैरांग ला छुइ चांगमा तातपा। खोसु पौलुस रांग सिलास ला रांए खांगबा रु दोतचि छिला कत ज्ञपा, ओएछिला खोशाक ओएरु दतताक।
पौलुस रांग सिलास मिया ला ओऐ ज़ारु थुयिका जहा यहुदि मिया मोलळम ज्ञकतु वोयिका। शाकतांग खोशाक ओयिरु डोज़िना योकमु जिक जो शिडि वोकान ते खोशाकला दयिका। शिडि कि छिनासू खो मिया कि ङोनशि शोतिकाक, ओएछिला खो ङोनशि शोतकान यिन से खो खोए जिनदाक कि छिला मुल युम कमाइ फितिका।
खोशाया फुडिज़िना ओए फोमु ते कुरा ज्ञयिका, “दि मिते कोंजोक कि तआन नोक। खो ख्योिशाक ला थारखिलजि लाम शोतिका!” खो शाकतांग वोतुक फितिका वोति सु पौलुस टोलांगसा।
जुङमाला, शाकचिक ओए योकमु ते कुरा ज्ञयिका, तो पौलुस सु खोए छोकला ज्ञुरचा खोए नांगकि शिडि तेला नावा, यीशु कि मिन नासु खोए नांगनासु फिताला थोन।” वोति ज़िना ओए शिडि तेसु खोला तांगबा।
ओए फोमु कि जिनदाक या ज्ञमनि छिङनाक लांगबा। खोशाक ला हुन छोतसाक कि ओए शिडि मिताला ओए योकमु ते मिया कि ङोनशि शोतगु मिछोतकाक। वोतुक सेरना कि मिया थाखोए जिनदाक ला मुल मितेरकाक। था खोशाक ला ङोनशि शोत कि खोशाक तांग ञाबु चि वोङावा।
ओएछिला ओऐ योकमु फोमु कि जिनदाक सु पौलुस रांग सिलास ला रोमि गोवाया कि दोरु खेरसाक। खोशाक पौलुस रांग सिलास ला दुंगबा, तेनि ञा खोशाक ला जेल दु चुकताक।
शाक सुम पौलुस रांग सिलास ला जेल कि वोतु क ज़ारु फोरचा वोका वोति ना युम मागबु सिपाहि वोका। ओए मागोता खोशाक सु खोशे कांगबा ला सिंग ञि रांग ञाबु दनशा वोका। परन्तुो पौलुस रांग सिलास छनमु ज़ामला कोंजोक कि ज्ञङलु तोयिका।
लानचिक ला, संग गुल जिहशा चिक वोंगबा ! जेल कि गो थाकपु फिसाक, कैदिया कि चाक थाक तोलि फिसाक।
तेनि दरोगा ते लांगसाक। खो थोंवाक कि जेल कि गो थाकपु फेशा वोका। खो सेंमबा कि कैदि तोलि शोरसाक। खो जिहसाक कि खोशाक शोरचा ङाला रोमि गोवाया सु सोतका, ओए छिला खो खोरांग ला सोतकान से फितिका। परन्तु पौलुस सु थोंवा तेनि कत ज्ञपा, “गुह तांग ! रांग ला नोत माकिल। ङाशाक तोलि दिना वोत।”
ओए दरोगा सु दारकिन जिक ला पौलुस रांग सिलास कि दोरु वोंगजा ठिवा, ”थारखिलजा ला मांग चि फितचा ?” पौलुस सु लान लोहवा, कोंजोक ला दंग चि, तेनि ख्योौत रांग ख्योचए पिरांग तोलि थारखिलका।” तेनि ओए दरोगा पौलुस रांग सिलास ला खोए खांगबा रु खेराक तेनि खोशे नतपु याला टुवा। पौलुस सु खोए खांगबि मि तोलि लायीशु कि बारे ला शतपा।
दरोगा रांग खोए पिरांग तोलि सु यीशु ला दंग चावा, ओए छिला पौलुस रांग सिलास सु खोशाकला छुइ चांगमा तातपा। तेनि दरोगा सु पौलुस रांग सिलास ला थाकतुक तातपा, तेनि खोशाक तोलि ञाबु गरि शिवा।
तिंगमा शाक युल कि अगुवो सु पोलुस रांग सिलास ला जेल नासु तोनताक तेनि फिलिप्पिन नासु थोंनसोंग नावा। पौलुस तेनि सिलास जमबुलिंग कि जिनमा रोह याला थुकपा तेनि ओए तिगंला ओए युल नासु थोन वोंगबा। तेनि यीशु कि बारे ला वुर शोतकिन फुताक तेनि कलिसिया छेपु डोयिका।
पौलुस रांग जिनमा मसिहि अगुवो सु युल युम ला फुताक। खोशाक सु मिया ला यीशु कि बारे ला शुभ वुर शतपा। खोशाक कलिसियाओ के विश्वासियो ला गरि रांग लोपचाला यि युम ठिवा। ओए नासु यि गनजिक बाइबल कि पेजा ज़ोवा।
प्रेरितों कि लाहा 16:11-40 नासु बाइबल चिक कि टुंग।