9.4 KiB
46. पौलुस मसीहि दिनछियान रु फुडाक।
शाउल मिन कि मि चिक वोका खो यीशु ला दंग माचावा। खो ख्योजकतोंग वोतज़िना, तब खोसु स्तिफनुस ला सोतकान मिया कि खोंनजा ला टुङान नोक। तिंगला, खोसु विश्वा सिया ला ङाजिन चावा। खोसु यरुशलेम कि खांगबा-खांगबा रु फुतचा टु फोमु तोलि ला ज़ुमजा जेल दु चुकताक। तेनि याजक छेपु सु शाउल ला दमिशक युल ला सोंग नावा। खोशाक सु ओएना वोकान मसिहिया ला ज़ुमजा खोशाकला लोकचा यरुशलेम ला खेगजा ला शाउल ला नावा।
शाउल सु दमिशक ला डोया सुकपा। ओए युल दु लेपचि मनताए थांगला, खोए थथि तोलि ला नमनासु वोतचिन सालवु वोत ज्ञपा, तेनि खो सेयरु फिरसाक। शाउल सु सुनांग चिक ला वोतुक सेरकिन छोरा, ”ऐ शाउल! ऐ शाउल! ख्योुत ङाला चिला ङाजिन फेतिता ?” शाउल सु ठिवा, ”ऐ कोंजोक, ख्योकत सु यिनदा ? यीशु सु लान लोहवा, ”ङा यीशु यिन। ख्यो त ङाला ङाजिन फितोक!”
जब शाउल लांगज़िना खो मिक थोंएमिका। खोए रोह तेसु खोला दमिशक ला खेरचा फुताक। शाउल सु शाकपा सुम छुवु चांगखांग मासोवा चांगखांग मातुंगबा।
दमिशक नगर ना हनन्याह मिन कि यीशु कि चेला चिक वोका। कोंजोक सु खोला नावा, ”ओए शाउलदतचा वोतसि खांगबा रु सोंग। रांए लाकपा खोए खातोक तु फोर तेनि खो ञा तागु छोतचा ला।” परन्तुत हनन्याह सु नावा, ऐ कोंजोक मांग छोर ओए मिते सु विश्वासि याला चुक ङाज़िन चावावा।“ कोंजोक सु खोला लान लोहवा, ”सोंग ! ङासु खोला यहुदियो ला दुरुग जिनमा रिह रुहा कि मिया ला ङाए मिन कि घोषना फितचाला दामशा वोत। खो ङाए मिन कि छिला ज्ञमनि काहु ञोङानुक।”
जुंगमाला हनन्याह शाउल कि दोरु फुता, रांए लाकपा ला खोए खातोक तु फोरा, तेनि नावा, ”यीशु सु, दिरु वोंग जिना लाम दु थुक माजुवा, ङाला ख्योाए दोरु तांगजुङ ताकि ख्योत ञा मिक थोंगजा ला, तेनि नमशे चांगमा ते ख्योए नांगदु वोंगजा ला।” वोति ज़िना खो मिक थोंए काक, तेनि हनन्याह सु खोला छुइ चांगमा तातपा। तेनि शाउल सु थाकतुक सोवाक तेनि खो ञा शेतचिन फुताक।
ओति ज़िना नासु, शाउल सु दमिशक रु दोतकान यहुदियों ला प्रचार फेतचा सुकपा। खोसु नावा, ”यीशु तेया कोंजोक कि टु नोक !” यहुदि मिया हालाशा वोका, चिला सेरना शाउल सु ता विश्वासि याला सोतचि छोत तावा, परन्तुउ था खो यीशु ला दिन छेका। शाउल सु यहुदियों रांग ञाबु ठुकपा तांगबा। खोसु स तोनबा कि यीशु तेया मसीह यिनोक।
शाकपा युम कि तिंगला, यहुदिया सु शाउल ला सोतचि ठोचावा। खोशाक सु खोला सोतचि छिला युल कि ज्ञलगो रु मिया ला तांगबा। कि खोला टुंगजा ला परन्तु शाउल ला ओए योजना ते हुन छोतसाक, तेनि खोए रोह या सु खोला ओए नासु शोर डोयाला खोए रोह चावा। शाकचिक गोंङमु खोशाक सु खोला कोनबि नांगदु चुकचा युल कि फिति सिकपा नाला खोला माला पापताक। दमिशक नासु थोनबि तिंगला शाउल यीशु कि बारे ला प्रचार फेतकिन दतपा।
शाउल प्ररितों ला थुकतु डोया ला यरुशलेम शहर ला फुता। परन्तुन खोशाया खोनासु जिका। तेनि बरनबास मिन कि विश्वासि सु शाउल ला प्ररितो कि दोरु खेरचा फुता खोसु खोशाकला शतपा कि शाउल चुकचा माझिहवा दमिशक रु प्रचार चावावा। ओए गुपला प्ररितो सु शाउल ला ञिनबा।
विश्वासि गनजिक जो यरुशलेम कि ङाजिन सु शोरसोङान याते अंताकिया सेरसा युल दु फुसाक तेनि यीशु कि बारे ला प्रचार फेतिका। अंताकिया रु दोतकान मिया मांगबु यहुदि मानोक, परन्तु गोमा ला, खोशे नांगना सु मि युम विश्वासि फुसाक। बरनबास रांग शाउल ओए सोमा विश्वासि याला यीशु कि बारे ला दुरुंग मांगबु शोतचि छिला ओएरु फुताक तेनि कलिसियाओं ला टानते ज़ोवाक। यीशु ला दिन छियान गोमा ला अंताकिया रु “मसीही” चावाक।
शाकचिक, अंताकिया कि मसीहि मिया ञिना टुंगशा मोल्लम ज्ञयिका। नमशे चांगमा सु खोशाक ला नावा, “ङाए छिला बरनबास रांग शाउल ला ओए लाहा ते फितचाला फेतोंग जिसे फितचाला ङासु खोशाक ला दिरु कत ज्ञपा।” ओए छिला अंताकिया कि कलिसिया सु बरनबास रांग शाउल कि छिला मोल्लम ज्ञपा तेनि खोए खातोक तु लाकपा फोरा। तेनि खोशाक सु खोशाञुहु ला जिनमा युम ज़ारू यिशु कि बारे ला शुभ संदेश ला प्रचार फेतचाला तांगबा। बरनबास रांग शाउल सु सो-सो रिह रुहा कि मिया ला लाफा, तेनि मि युम यीशु ला दिन छिवाक।
प्रेरितों कि लाहा 8:3; 9:1-31; 11:19-26; 13:1-3 नासु बाइबल चिक कि टुंग।