9.9 KiB
42. यीशु स्वरग ला लोक डिका।
ओए शाक कोंजोक सु यीशु ला शिनबु नासु सोनपु ज़ोवा, खोए चेला ञि दोए युल ला डोएका। डुलकिन जिक ला यीशु कि वुर तोङिन डोएका, खोशाक ला रेवा वोका कि खो मसिह नोक से। परन्तुि वोतुक चाया सु कांग खोला सात ताक। था ओए खिमामु या सेरिका कि खो ञा सोनपु फुसाक। खोशाक शे मिका कि खांग वुर ला दिन छेया।
यीशु सु खोशे दोरु वोंगशा खोशाक तांग ञाबु डुलजा सुकपा, परन्तु खोशाक सु खोला माशिवा। खोसु ठिवा कि ख्यो शाक सुए वुर तोएंता। खोशाक सु खोला शाकपा गनजिक यीशु रांग ञाबु चि चि चावा वाओए थाकपु शतपा। खोशाक सु सेमबा कि खोशाक ओए डुलवा चिक तांग ञाबु वुर तोए से वोका। जिसको यरुशलेम दु चि चावावा हुन मिका।
तेनि यीशु सु खोशाक ला शतपा कि कोंजोक कि लुंग ते मसीह कि बारे ला चि सेरिकावा।युम थांगला, ङोनशि शोतकान यासु चावा कि मि ङानबाया मसीह ला दुङा तेनि सात तोंङा। परन्तुा खोशाक सु वोतुक कांग चावा कि खो शाकपा सुम कि तिंगला लांग वोङा।
जब खोशाक युल दु लेपा खोशाक ञुहु ओय रु दोतमु वोका, वोचम छुहु ला गन फिरो फुतदिका। खोशाक सु यीशु ला खोशाक तांग ञाबु दोतचा ला चोला, जुङमाला खो खोशाक ताङ ञाबु खागबा जिकतु फुताक। रांए गोंगमु कि थाकतुक साया दतपा। यीशु सु रोटि चिक लेनजा ओए छिला कोंजोक ला वोरछे नावा, तेनिओए रोटि ला चाकपा। लानचिक ला, खोशाक सु शेसाक कि ओए ते यीशु नोक से। परन्तु वोति जिना, खो खोशे मिक माथों सा नाला फुसाक।
ओए मि ञुहु चिक तांग चिक ला नावा, “ओए ते यीशु नोवा! ओए छिला जब खोसु वोशाक ला कोंजोक कि लुंग ला लाफजिना मांगशाक ज्ञमनि गरि चा!” खोशाक वोते ज़िना थोन शा यरुशलेम ला फुता। ओएरु लेपचा सु खोशाक सु चेला या ला शतपा, ”यीशु सोनपु दुक ! ङाशाक खोला थोंग !”
जब चेलाया वु र तोंगज़े ना, यीशु वोतिज़िना ओए खांगबे नांगदु खोशे दोरु थौन वोंगबा। खोसु नावा, “ख्योलशाक ला लौ दिमु वोंग छुक!” चेला यासु सेबांक कि खो लांडि नोक,परन्तुा यीशु सु नावा, “ख्यो“शाक चिला जियिता? ख्योदशाक वोतुक चिला सेमि मिता कि दि दिनबाला ङा यिन? ङाए लाकपा रांग कांगबा ला तो।लांडिया कि दोरु वोतुक जुहु मियोंङा जैसा ङाए दोना वोकान चोनि।” खो लांडि मान से दोनजाला, खोसु सालांग जिक रेवा। खोशायासु खोला ञा कि छाकपु चिक तातपा, तेनि खोसु ओएति सोताक।
यीशु सु नावा, “ङाए बारे ला कोंजोक कि लुंग ला चि सेरना कांग ओए वोतुका वोङा। ङा सु ख्योफशाक ला शतचा वोत कि वोतुक वोंगजा खाकचिन नोक। तेनि यीशु सु खोशाक याला कोंजोक कि लुंग दिमु चाया लाफाक।खोसु चावा, “युम थांगला ङोनशि शोतकान यासु ठिया वोका कि ङा मसिह ला ज्ञमनि काहु वोंगजा वोका, शिगु वोङा तेनि शाकपा सुम कि तिघला शिनबु नासु लांगशा वोङा।
“ओए ङोनशि शोतकान यासु वोतुक कांग ठिवा कि माए चेला या कोंजोक कि वचन कि हाकोतका। खो मि रेरे ला ज्ञोतपा फेतचा ला शोतका। खालते खोशाक वोतुक फेतचाना कोंजोक खोशे दिकपा ला माफ फेतका। माए चेलाया ओए लोन ते शोतचा ला यरुशलेम नासु सुकाक। तेनि खोशाक ज़ा तोलि रिह रुहा तोलि कि दोरु डोवाक। ङा चि सेरकान रांग फितकान ते तेनि ङारांग ञाबु चि चाया वोकान ते, तेने ख्यो शाक ङाए वुर रांग लाहा तोलि कि पांगबु नोक।“
ओए शाकपा जिपचु कि छुहु, यीशु रांए चेला या कि दोरु लनमा युम वोंगबा। लनमा चिक कि नांगदु लामसाम मिदा 500 ला थोंवा ! खोसु खोए चेलाया ला जुह युम नासु तोनबा कि खो सोनपु वोत से, तेनि खोसु खोशाक ला कोंजोक कि राज्य कि बारे ला लाफा।
यीशु सु चेला याला नावा, “कोंजोक सु ङाला स्वरग रांग जमंबुलिंग कि मि थामशि ला शासन फेतचि आंग तातचा वोका। ओए छिला था ङा ख्योशतला सेरे: कि रिह रुहा तोलि ला चेला ज़ो। वोतुक फेतचाला ख्योुशाक खोशाक ला आपा, टु तेनि नमशे चांगमा कि मिन नासु छुइ चांगमा थोत। ङा चि कांग ख्योाशाक ला सेरकान वुर ला ञिनजा खोशाक ला लोपचानुक। आतला फोर, ङा फादिंग ख्यो शाक रांग ञाबु दोतका।”
यीशु कि शिसा नासु लांगबि शाकपा जिपचु कि तिंगला, खोसु रांए चेलाया ला नावा, “जब तक ङाए आपा ख्यो तला नुएफा तेरतेर छुहु वोचाम छुहु यरुशलेम दु दोत। खो ख्योाए खातोरु नमशे चांगमा तांगजा वोतुक फेतका।” तेनि यीशु स्वरग ला फुसाक, तेनि टिन छेपु चिक सु खोला खोशि थोंगसा नासु बताक। स्वरग तु यीशु नोर तोलि ला शासन फेतचाला कोंजोक कि योनमा छोक ला दतपा।
मत्ती 28:16-20; मरकुस 16:12-20; लूका 24:13-53; यूहन्ना 20:19-23; प्ररितों कि लाहा 1:1-11 नासु बाइबल चिक कि टुंग।