5.1 KiB
41. कोंजोक यीशु ला शिरो नासु लांगबा।
माहमियासु यीशु ला क्रुस कि खातोरु क्यलओनबि तिंगला, यहुदि अगुवो सु पिलातुस ला नावा, “ओए ज़ुनडिया, यीशु सु सेराक कि खो शाकपा सुम कि तिंगला शिसा नासु लांग वोङा। मि चिक ला रो फोरसा रु टुंगदु जुगु वोङा कि खोए चेला या खोए रो ला मिखिरचाला। खालते खोशाक वोतुक फितचाना तेनि खोशाक सेरका कि खो शिसा नासु लांग साक।”
पिलातुस सु नावा, ”माहमि गनजिक ला खेरला सोंग, तेनि ख्योोत चुक फेतमु वोतना कांग रोला टुंगदु छुक।” ओएछिला खोशाक सु रो फोरसे गो तिला ज़े ज्ञपचा फोरा। खोशाक ओएरु ताया ला माहमि फोरा कि सु कांग खोए रो ला कु मि सेमजा।
यीशु कि शिवि तिंगमा शाक सब्त। कि शाक नोक। सु कांग ञिना कि शाक लाहा मिफितका, ओए छिला यीशु कि रोह सु कांग रो फोरसा रु मायोंगबा। परन्तु ञिना कि तिंगमा शाक, ङामु ना, खिमामु गनजिकयीशु कि रो फोरसा रु डोयाला छोमिका। खोशाक यीशु कि जुहु ला थुना मसाला कुतमु वोका।
ओति खिमामु या लिपचि थांगला, रो फोरसा रु संगुल वोंगबा। स्वरग नासु स्वरगदुतचिक वोंगशाओए रो फोरसे गो ला गाहशा वोकान दुवा छेपु ला फुलजा ओए खातोक तु दतपा। ओए स्वरगदुत ते वोत ज्ञयिका। रो ला टुंगशा वोकान माहमि या थोंवाक। खोशाक वोचम जिहसाक कि शिरो कि लामु खोशाक सेरु फिरसाक।
जब ओए खिमामु या रो फोरसा रु लेवा तेनि ओए स्वरगदुत सु खोशाक ला नावा, “माजिह।यीशु दिना मिका, खो शिसा नासु लांगसाक, जैसा खोसु चावा कि खो लांग तोङा! रो फोरसा रु तो फोत।” ओए खिमामु या रो फोरसि नांगदु ओए थाकपु ला फाताक तेनि खोशाक थोंवाक खोए रो ओएना मिका !
तेनि ओए स्वरगदुत सु ओए खिमामु ला नावा, ”फुतला खोए चेला या ला शोत, यीशु शिसा नासु लांग साक दुरुंग खो ख्योुशे थांग– थांग ला गलिल ला डोवाक।”’
ओए खिमामु या हा ला साक तेनि ज्ञमनि गरि चावाक। खोशाक चेला याला ओए लोन ते शोततु फांग ज्ञुहशा फुता।
जब ओए खिमामु या ओए लोन दिमु ते शोततु लाम नाला फुडिज़िना, यीशु ते थोन वोगबा। खोशाक खोए कांगबि थारु फिरसाक। तेनि यीशु सु नावा, ”माजिह। फुतला ङाए चेला याला गलिल ला सोंग नो। खोशाक ङाला ओएरु थोङा।”
मत्ती 27:62-28:15; मरकुस 16:1-11; लूका 24:1-12; यूहन्ना 20:1-18 नासु बाइबल चिक कि टुंग।