8.5 KiB
39. महासभा रु यीशु कि खातोरु पेशी।
था दि गोङमु ज़िना नोक। ओए माहमि तेसु यीशु ला महायाजक कि खांगबा रु खेरा, चिला सेरना खो यीशु ला ठिमु वोका। पतरस ते थाकरिंग नासु खोशि गुपला डोयिका। जब माहमि ते यीशु ला खांगबा रु खेंगजिना, तेने पतरस ते फिता रु दतचा मे डेयिन वोका।
खांगबे नांगदु, यहुदि अगुवौ सु यीशु कि खातोरु ठुकपा ज्ञपा। खोशाक खोए खिलाफ वुर ज़ुनबा सेरचा ला ज़ुनबा पांगबु ला खेरका वोंगबा। हालाकि, खोशे वुर चिक तांग चिक ला डिए मिका, ओए छिला यहुदि अगुवे दोनगु माछोत कि खो दोषि नोक से। यीशु ते चांग खांग मा नावा।
जुङमाला, महायाजक सु शुक यीशु ला ताया नावा, “ङाला शोत कि चि ख्यो त सोनपु कोंजोक कि टु मसिह यिनदा?”
यीशु सु नावा, “हुं ङा यिन, दुरुग ख्योित ङाला कोंजोक तांग ञाबु दतचा रांग स्वरग नासु वोङिन थोंङा। “याजक छिपु तेसु रांए खोंनजा शाहता चिला सेरना यीशु सु सेरकान तेला खो छिङनाह लांगबा। खोसु जिनमा अगुवो ला कुरा ज्ञपा, ”ङाशाला दि शोतचा ला जिनमा पांगबु गोशा मिडाक कि दि मितेसु चि चावावा! ख्योाशाक रांग सु खोला वोतुक सेरा छोरा कि खोकोंजोक कि टु नोक। ओति ला ख्योअशाया चि सेमि रावा?”
यहुदि अगुवों सु महायाजक तेला लान लोहवा, ”खो शिया रांन दिका!” तेनि खोशाक सु यीशु कि मिंग ला रा दमताक, खोला थु ज्ञपा, खोला दुङबा तेनि खोला ङोज़ा कुवा।
तेनि पतरस, जब खो खांगबे फिता ना गुहशा वोतज़िना। तेनि योकमु फोमु चिक सु थोंवा। खोसु खोला ठिवा, “ख्योत कांग यीशु रांग ञाबु वोता!” पतरस सु मन नावा। तिंगला, जिनमा फोमु जिक सु वोतुका नावा, तेनि पतरस सु ञा मन नावा। ज़ुङमाला, मि गनजिक सु नावा, “ङाशाक ला हुन वोत कि ख्योत यीशु कि ञाबु वोका चिला सेरना ख्योशाक ञिकार गलिल नासु नोक।“
तेनि पतरस सु नावा, “खालते ङा दि मि ला शेना कोंजोक ते ङाला मोनमु ज्ञाका!” ओते ज़िना पतरस ना किल वि तिंगला, वोतिज़िना कुकरि सु कात ज्ञपा। यीशु सु फिविल ला लोकचा पतरस ला तावा।
पतरस ओएनासु वोंगताक तेनि खो ज्ञमनि ङुवा। वोते ज़िना, यीशु ला ज़ुमङान यहुदा ते थोंवा कि यहुदी अगुवो सु यीशु ला शियि सजा तातपा। यहुदा ज्ञनमि दुङाल चुआक तेनि खो फुतचा खोरांग ला सातताक।
था ओए छवनि कि राज्यपाल तै पिलातुस नोक। खो रोम कि छिला लाहा फेतका। यहुदि अगुवे यीशु ला खोए दोरु खिंगबा। खोशाक सेमिका कि पिलातुस खोला शियि सजा तेरका तेनि खोला सात तोंजा। तेनि पिलातुस सु यीशु ला ठिवा, ”चि ख्योशत यहुदिया कि ज्ञलवु यिंदा?”
यीशु सु लान लोहवा, ”ख्योात सु दिनबा सेराक। परन्तु ङाए राज्यब दि जमबुलिंग कि मन। खालते यिंनजा ना ङाए योकपु ङाए छिला माह थारका। ङा ज़मबुलिंग दु कोंजोक कि बारे ला दिनबा शोततु वोगं। मि सु कांग दिनबा ला ञिमु फितकान ते ङाए ञानङा। ”पिलातुस सु नावा,“ तेनि दिनबा चि नोकपा।
यीशु रांग ञाबु वुर तांगबि तिंगला, पिलातुस सु फितारु मिया कि दोरु फुतचा नावा, ”ङाला वोतुक चांग कांग मानलोक थोंग माजुंग जो दि मिते ला सोतचि छिला।” परन्तु यहुदि अगुवे रांग मिया कि छोंम सु कुरा ज्ञपचा नावा, ”खोला क्रुस ला क्यो न तोंग!” तेनि पिलातुस सु नावा,”खोसु मानलोक चावि दोषि मानोक।खोशाक थुना कुरा ज्ञयिका। तेनि पिलातुस सु लनमा सुमला नावा, “दि मिते दोषि मानोक!”
पिलातुस जिहसाक कि मिया कि छोंम लाक डिया सुक मि, ओए छिला खो रांए माहमिया कि छिनासु यिशु ला क्रुस ला क्योनजा ला ञिनसाक। रौमि माहमिया सु यीशु ला चालताक ज्ञपाक, तेनि खोला खोनजा मिंजिन कोंदा, तेनि खोए गोला छिरमांग कि मुकुत कोंदा। तेनि खोला वोतुक छाया ञोज़ा कुतिका, ”तोनियो, यहुदियों कि ज्ञलवु!”
मत्ती 26:57-27:26; मरकुस 14:53-15:15; लूका 22:54-23:25; यूहन्ना 18:12-19:16 नासु बाइबल चिक कि टुंग।