7.1 KiB
37. यीशु लाज़र ला शिनबु यानासु सोनपु फुडाक।
लाज़र मिन कि मिचिक वोका। खोए नोमु ञि वोका खोशे मिन मरियम रांग मारथा नोक। खोशाक तोलि यीशु कि दिमु रोह नोक। शाकचिक, सुनांग चिक सु यीशु ला शतपा कि लाज़र ज्ञमनि नाएका। जब यीशु सु वोतुक छोरचा नावा,”दि नाज़ा ते लाज़र कि शिया रांग मिसेनङा। दि मिया ला कोंजोक ला दिमु फितचि छिला लोपका।”
यीशु रांए रोहयाला ज्ञमनि ञिमु फेतका,परन्तु खौ वोतसा रु खोसु शांगमा ञि गुहवा। ओए शाकपा ञि कि तिंगला, खोसु रांए चेला याला नावा,”शोक यहुदिया प्रदेश ला लोक डोया।”चेलों सु लान लोहवा,”परन्तु ऐ गुरु, थासांग शाकपा गनजिक थांगला ता ओएना मिया ख्यो्तला सात तोंगमु वोका!”यीशु नावा,”वोशे रोह लाज़र ते ञालसाक तेनै ङा खोला लोंगलांग यिन।”
यीशु कि चेला यासु लान लोहवा,”ऐ प्रभु,खालते लाज़र ञालदेना, तेने खो गा डाक।”तेनै यीशु सु खोशाक ला साफ नावा,”लाज़र शिसा यिनना। ङा गरि वोत कि ङा ओएना मित,ताकि ख्योशाक ङाला दिन छियाक। " जब यीशु लाज़र कि युल रु लिवा लाज़र ला शिया शाकपा जि थांगना सु फुडिका। मारथा यीशु ला थुकतु फिताला वोंगबा तेनै नावा,”ऐ प्रभु, खालते ख्योत उइना वोतचाना ङाए आजु मशिवा ओका। परन्तु ङा ख्योात ला दिन छेयित कि ख्योत कोंजोक नासु चि रेना कांग खो ख्योततला तेरका।” "
यीशु सु लान लोहवा,”शिसा नासु ञा लांगजा रांग मिज़े ङा यिन। सु यिन ना कांग ङाला दिन छेया ना खालते खो शिडोया ना कांग लांग वोङा। सु कांग ङाला दिन छिया ना खो नम कांग मिशियाक। चि ख्योत उइ ला दिन छेता मारथा सु लान लोहवा,” होए प्रभु ङा दिन छित कि कोंजोक कि टु मसिह नोक।”
तैने मरियम वोंगबा। खोसु यिशु कि कांगबा रु जुमजा नावा, ”ऐ प्रभु खालते ख्योंत दिरु वोतचाना ङाए आज़ु माशिवा वोका। यीशु सु खोला ठिवाक, ”ख्यो त सु ल़ाजर ला खांगदु फोरा? ”खोशाक सु खोला शतपा, ”रुंग दु। शोक तेने तोरांग।” तेनि यीशु ते ङुवाक।
ओति दुआ छिपु के फु चिक वोका ओए गोना दुआ छिपु जिक कापचा वोका। जब यीशु रुंग दु लिपा तो खोसु खोशाक ला नावा, दुआ फाला फोर। ”परन्तु मारथा सु नावा, “खोला शिया शांगमा जि फुसाक। ओएनासु ठिमा वोएंडो।”
यीशु सु मारथा ला नावा, “चि ङासु ख्योुतला सेरि मिडावा कि खालते ख्यो त ङाला दिन छिया ना कोंजोक कि नुइफा थोङाक?” ओए छिला खोशाक सु ओए दुआ ते फाला फुला।
तेनि यीशु सु स्वारग छोकला ताशा नावा, “ऐ आपा, माए वुर ञानजाला मांग ञेला वोरछे सेरित। मांग ला हुन वोत कि ञित फादिंग माए वुर ञानङा, परन्तु मांगसु दिना लांगशा वोतकान मि तोलि कि रोह फेतचाला चा ताकि खोशाक दिनछिया ला कि ञित सु मांगला तांगबा।” तेनि यिशु सु कात ज्ञपाक, “ऐ ल़ाजर, फिताला थोनला शोक!”
था ल़ाजर फिताला वोंगबा! खो थासांग कांग रोफाचि तुमशा वोका।यिशु सु खोला नावा, “दि रोफाचि ला लुकचा ला खोए रोह चे तेनि खोला डोरु छुक।” ओए नुइफा कि छिनासु यहुदि युम सु यीशु ला दिन छिवा।
परन्तु़ यहुदियों कि धारमिक अगुवे यीशु ला थुएका, ओएछिला खोशाक जोमजा ठो चावा कि चुकचा यीशु रांग ल़ाजर ला सोतचा।
यूहन्ना 11:1-46 नासु बाइबल चिक की टुंग।