7.6 KiB
35. ञिंग ज़िमु आपा कि टुंग।
शाकचिक, यीशु ओए मि युम ला लोपिका जो खोला ञनजा ला ज़ोमदिका। दि मिया चुगीं लेनङान रांग जिनमा मि कांग वोका जिन्हो ने मुसा कि व्यजवस्था ला ञिनजि कोशीश माचावा।
धारमिक अगुवे गनजिक सु थोंवा कि यीशु उइ मिया रांग ञाबु रोह कि लामु वुर तोएंका। ओए छिला खोशाक चिक तांग चिकला लाविका कि खो मानलोक फितोक। यीशु ते खोशाक या कि वुर छोरसाक, ओए छिला खोसु खोशाकला टुंग चिक शतपा।
“मि चिक वोका खोए टु नि वोका। टु चुन तेसु खोए आपा ला नावा, ‘ओए आपा मांगला माए काला ते गोआन!’ था आपा तेसु खोए टु नुहु कि जुङदु खोए मुल ते गोशा तातपा।”
“ओते ज़िना टु चुनते रांए चि वोत ना कांग तोलि दुशा जिनमा छवनि ला फुसाक तेने दिकपि मेज़े क्यों जा ला रांए मुल सेनदु चुकताक।”
“ओए तिंगला ओति टु चुन ते वोतसि छवनि रु ज्ञमनि आनकालांग वोगबा, दुरुग खोए दोना सापतुंग ञोया ला मुल कांग मिका। ओए छिला खोला लाहा थोपचा वोकान ते फाक याला छोया ला थोपा। खो उदुक दुकपु रांग तोकरि वोका कि फाकया कि सापतुंग सोया ठोतपा कोङमु वोका।”
“जुङमाला, वोति टु चुन ते खोरांग ला चावा, ङा चि फेतिकावा? ङाए आपा कि योकपुया तोलि कि दोना कांग सालाङ युम वोका, ओतुक चायासु कांग ङा दिना तोकरि ला वोका। ङा ङाए आपा कि दोरु लोकचा डोआन तेने आपा कि योकपु ला दोतचाला खोला चोलकान।‘“
“था ओए टु चुन ते खोऐ आपा कि खांगबा ला लोकचा वोएका। थासांग खो मालिवा वोका, खोए आपा सु खोला वोंआ थोंवा तेने खोला ञिंग जिवा। खो ज्ञुहशा खोए टुए दोरु फुता तेने खोला आकचि ज़ुमबा।”
“ओए टुते सु नावा, ‘ऐ आपा, मांग कोंजोक रांग ञे खिलाफ दिकपा चा। मांग ञे टु सेरचि लायक मित।‘“
“परन्तु आपा सु खोऐ योकपु चिक ला नावा, ‘ज्ञोहवा फुतला सिंगसांग गांङशेन खोंनजा खेंगला ङाए टुला कोन! खोए ज़ु ला सुरतुप तेने खोए कांगबा ला काफशा कोन। सिंगसांग दिमु छुंगमा सोत वोशाक सायाला तेने वोशाक लादु फेतचा, चिला सेरना ङाए टु शिसाक! परन्तु खो लांगजा वोंगबा! खो क्यललसाक, परन्तु खो ङाला थोपसाक!”’
“ओए छिला मिया सु लादु फेतचा सुकपा। नामला गनजिक कि तिंगला, टु छेपु ते शेङगि लाहा चाया खांगबाला लोकचा वोंगबा। खोसु लु रांग चेयि कात छोरा तेनै हालासाक कि दि चि फितिकावा।”
“जब टु छेपु ला हुन छोता कि खोशाक ओए छिला लादु फेतिका चिला सेरना खोए नोते खांगबा ला वोंगदिका, तेनि खो ज्ञमनि छिङनाह लांगबा तेने खांबि नाङला माफुता। खोए आपा फिताला वोंगशा खोशाक तांग ञाबु लादु फेतचाला चोलाक, परन्तु खो माञिनदा।”
“ओए टु छेपु तेसु खोए आपा ला नावा,‘वोचम लौ मांगबु मांग ञि छिला सेमनासु लाहा चा! नामकांग ञि वुर ला मचत,परन्तुु ञित सु नमकांग मांगला रिउ चुन जिक कांग तात माजुंग ताखि मांग रोह या रांग ञांबु दावत फेतचाला।परन्तु उइ टु सु ख्यो ए मुल ला दिकपि लाहा फेतचाला सेनदु चुकताक।तेने था खो लोकचा वोंगजा वोतजिना खोए छिला लादु फेतचाला सिंग सांग छेपु छुंगमा ला सात तोआ!”’
“आपा सु लान लोहवा, ‘ऐ टु, ख्यो त फादिंग ङारांग ञाबु वोका, तेने चि वोतना कांग तोलि ख्योंए नोक। परन्तुवोशे छिला लादु फेतचा ते दिमांग नोक चिला सेरना ख्यो ए नोते ठोंहग साक, तैने लांग वोंगबा। खो क्यलसाक,था खो थोपदिका!”
लूका अध्याय 15:11-32 नाउ बाइबल चिक की टुंग।