5.5 KiB
28. छुकपु ख्योकतोंग ज्ञलवु।
शाकचिक, ख्योकतोंग छुकपु गोवा चिक यीशु कि दोरु वोंगबा तेने ठिवा, “ए गाङशिन बवु, फादिंग कि मिज़े कि छिला ङा चि फेतचा?“ यीशु सु नावा, “ख्योगत ङाला ‘ज्ञाङशिन ‘ चिला सेरिता ? ज्ञाङशिन ते लिम चिक वोका ओएति कोंजोक नोक। परन्तु खालते ख्योत ला फादिंग कि मिज़े गोना तेनै ख्यो त कोंजोक सु गोदुशा वोकान ला दिमु छेला फोर।”
“मांग ला खांग खांग हुक्म या कि पालन फेतचावा?” खौ सु ठिवा। यीशु सु लान लोहवा, “मि ला मिसोतचा। लाहा आखि मिफितचा। कुनमा मिकुया, ज़ुन मिकुया, रांए आमा आपा कि इज्ज त फेतचा, तेने रांए खेमजि ला रांग कि लामु ञिमु फेतचा।“
परन्तु ओए टु ख्यो कतोंग तेसु नावा, “ङा ता चुन नासु ओए हुक्म थाकपु ला ञिनित। मांगला फादिंग कि छिला मिज़े गोना थुना चिफेतगु वोङावा?” यीशु सु खोला ताया तेने खो ला ञिमु चावा।
यीशु सु लान लोहवा, ”खालते ख्यो त थार खि लमु वोतना तेने फुतला रांए चि वोतना कांग तोलि छोंग तोंग तेने मुल थाकपु मितपु याला थोत तोंग, तेने ख्योोतला स्विरग रु मुल थौपका। तेने वोगंला ङाए गुपला शोक।”
जो यीशु सु सेरकान ते ञनजा ओए टु ख्योकतोंङ ते ज्ञमनि दुङाल चावा, चिला सेरना खो छुकपु नोक तेने खो रांए नोर तोलि तेरमु मिका। ओए छिला खो यीशु कि दोनासु ज्ञुरचा फुसाक।
तेने यीशु ते रांए चेलों ला नावा, ”कोंजोक कि राज्य रु मि छुकपु या डोया ज्ञमनि काहु दुक! ओंग, मि छुकपु चिक ते कोंजोक कि राज्य रु खेरचा सांग उट ला खाप कि मिक नाला चाया थोनजा लाहा लामु वोत डो।”
जो यीशु सु सेरकान ते चेलाया छोरा खोशाक सु नावा, “खालते वोतुक यिनना तेने कोंजोक सुला क्योफकावा?”
यीशु सु चेलों ला तावा तेने नावा, “मिया कि छिला रांग ला मुक्तिक फेतचा काहु वोका। तेने कोंजोक कि छिला चि फेतना कांग काहु मिका।”
पतरस सु यीशु ला नावा, “मांगशाक चुञिं चेलाया रांए तोलि युहशा ञि गुपला वोंगदिका। तेनि मांगशि ख्यो मा चि वोकावा?”
यिशु सु लान लोहवा, “ओए मि तोलि जिसने ञायि छिला खांगबा, आजु नोमु, आपा-आमा, छिवा, तेने नोर तोलि युहशा वोगबा, खो ओए सांग कांग 100 गुना मांगबु थोपका तेने फादिंग कि मिज़े कांग थोपका। परन्तु युम थांगला वोकान ते तिंगला, तेनि युम तिंगला वोकान ते थागला वोङा।”
मत्ती अध्याय 19:16-30; मरकुस 10:17-31; लूका 18:18-30 नासु बाइबल चिक की टुंग।