12 KiB
21. कोंजोक मसीह ला तोंगजि णा किलका।
जब कोंजोक सु जंबुलिंग ला ज़ो जिना, खोला हुन वोका कि शाकचिक मसीह ला जंबुलिंग दु तोंगु वोङा। खोसु आदम रांग हव्वाा ला णा किला खो वोतुक फेतकान। खोसु चावा हव्वा नासु रिह रुहा चिक कियानुक जो डुल कि गौला नोनङा। जिस डुल तेसु हव्वा ला डोख्यान ते निसन्देचह लांडि नोक। कोंजोक कि सेरथांग नोक कि मसीह ते लांडि ला फामदु जुका।
कोंजोक सु अब्राहम रांग ञाबु प्रतिज्ञा कि छिनासु जमंबुलिंग कि रिह रुहा तोलि ला आशीष थोपका। कोंजोक नमकांग मसीह ला तोंगजे प्रतिज्ञा वुर तोलि फेतका। ओए मसिह ते जमबुंलिंग कि रिह रुहा तोलि ला दिकपा नासु फिताला दोनङा।
कोंजोक सु मूसा रांग ञाबु णा चावा कि दितिंग जि ला मूसा कि लामु जिनमा ङोनशि शोतकान ला तोङा। ओए ङोनशि शोतकान ते मसिह नोक। ओए लुह ना सु, कोंजोक सु ञा प्रतिज्ञा चावा कि खो मसीह ला जमबुंलिंग दु तोङा।
कोंजोक सु ज्ञलवु दाऊद रांग ञाबु प्रतिज्ञा चावा कि खोए खानदान मसिह नोक। खो ज्ञलवु नोक तेने कोंजोक कि मिया कि खातोरु फादिंग शासन फेका।
कोंजोक सु यिमयाह ङोनशि शोतकान ला वुर तांगबा तेने नावा शाकचिक खो थामजा सोमा दमङान। ओए थामजा सोमा ते इस्राएल कि सिनै लारु दमङान चोनि मिका। जब मिया रांग ञाबु खोरि थामजा सोमा ते दमज़िना, तेने खो खोशाकला खोरे दिमांग जुहु रांग दोरु वोङा। मि तोलि खोरांग ञाबु ञिमु दोतका तेने खोए गोदुशा वोकान ला तामुक वोङा। कोंजोक सु चावा कि खोए गोदुशा वोकान ते खोशे ञिंग दु ठिवार कान चोनि वोका। ओए खोए मिया नोक, तेनि कोंजोक खोशि दिकपा ला माफ फेका। ओए ते मसीह नोक जो खोशाक तांग ञाबु थामजा सोमा दमङा।
कोंजोक कि ङोनशि शोतकान यासु वोतुक कांग चावा कि मसीह ङोनशि शोतकान चिक वोङा। ङोनशि शोतकान ओए मि नोक जो कोंजोक कि वुर ला ञानजा तेने मिया ला शोतकान ते। तेने मिया ला कोंजोक कि लोन ला हा कोतका। ओए ला तोङजा ला कोंजोक सु थामजा चाया वोका कि मसीह ते सिद्द ङोनशि शोतकान वोङा। सेरथांग ते वोतुक कि मसीह कोंजोक कि लोन ला दिमुचाया ञानङा, तेने खो मिया ला ओए लोन ला दिमु चाया लोपका।
इस्राएलि याजक यासु मिया कि छिला कोंजोक कि दोरु प़ुज़ा तोंगङिन दता। ओए पुज़ा ते मिया कि दिकपा कि छिला कोंजोक सु काहु कोतसि ज़ारु तोंएका। पुजारिया सु मिया कि छिला मिहवा कांग चावा। परन्तुिओए मसीह ते पुजारि छेपु नोक जोकोंजोक ला तेरचा ला सिद्द बलि कि लामु खोरांग ला तांग तोङा। खौ दिकपा फांदिग मिफितका, तेने खोरांग ला पुज़ा तोंगजा ला तेरका, था जमबुंलिग कि पुज़ा जिनमा कांग तेरगु मियोङा।
मिया कि छो ला ज्ञलवु रांग प्रधान शासन फेतका, नमथुरि खोशाक मानलोक फेतका। ज्ञलवु दाउद सु लिम इस्राएल रु शासन चावा, परन्तु ज्ञलवु दाउद कि रिह रुहा मसीह सु जमबुलिंग तोलि ला शासन फेतका, तेनि खो फादिंग कि छिला शासन फेका। ओए मागोता, खो फादिंग ठांगबु रांग ञाबु शासन फेका, तेने खो ठांगबु फैसला फेकाक।
कोजोंक के ङोनशि शोतकान यासु मसीह कि छोकनासु वुर युम चावा। मलाकि ङोनशि शोतकान सु चावा कि मसीह कि वोंगज़े थांगला जिनमा ङोनशि शोतकान वोङा। ओए ङोनशि शोतकान ते ज्ञमनि खाकचिन वोङा। ओए मागोता, यशायाह ङोनशि शोतकान सु ठिया वोका कि मसीह नामाला माफुतकान फोमु चिक ला कियाक, तेने मिका ङोनशि शोतकान सु चावा कि मसीह बैतलहम युल दु कियाक।
यशायाह ङोनशि शोतकान सु चावा कि मसीह गलिल सेरकान ज़ारु दोतका। सु मि ज्ञमनि दुकपु ला वोकान याला मसिह शान्ति तेरका। खो कैदिया ला कांग तोनङा। मसीह नातपा या ला तेने सु मि मिछोरकान, मिथोङान, सेरगु मिछोतकान, मि डुलगु मिछोतकान खोशाकला कांग गारु जुका।
यशायाह ङोनशि शोतकान सु वोतुक कांग चावा कि मिया मसीह ला मिगानुक। तेने खोला मिञिनङ। जिनमा ङोनशि शोतकान सु चावा मसीह के रोह चिकखोए खिलाफ लाङा। जक्रयाह ङोनशि शोतकान सु चावा खोए ओए रोहते वोतुक फेतचाला जिनमा नासु मुल कि सिक्का सुमजु लेनङा। ओए मागोता, ङोनशि शोतकान गनजिक सु वोतुक चावाकि मिया मसीह ला सात तोङा, तेने खोए खोनजा कि छिला छोलो चियाक।
ङोनशि शोतकान यासु वोतुक कांग चावा कि खो चुकचा छियावा। यशायाह सु ङोनशि शतपा कि मिया ते मसीह ला थु ज्ञका, खोला ङोज़ा कुला, तेने खोला दुङाक। खोला मियोंग पुक तोङा तेने खो ज्ञमनि काहु रांग सुकज़िर तांग शिडोवाक, जबकि खो सु मानलोक चांगखांग माचावा।
ङोनशि शोतकान यासु वोतुक कांग चावा कि मसीह ते दिकपा मिफितका। खो छांगबु वोङा। परन्तु खो ओए छिला शियाक चिला सेरना कोजोंक खोला मिया कि दिकपा कि छिनासु काहु कोतका। खोए शिया नासु मिया कोंजोक रांग ञाबु ओए छिला कोंजोक सेमिका कि मसीह शिया।
ङोनशि शोतकान यासु वोतुक कांग चावा कि कोंजोक मसीह ला शिया नासु लांगजा खेङाक। ओए थाकपु थामजा सोमा दमजि कोंजोक कि ठो नोक, ताकि खो ओए मिया क्योंफशि छिला जिन्होने खोए खिलाफ दिकपा चावा।
कोंजोक सु ङोनशि शोतकानयासु मसीह कि बारे ला वुर युम ला तोनबा, परन्तु मसिह ओए ङोनशि शोतकान या कि नांगना सुइ मिज़े रु मायोंगबा वोका। दि ङोनशि शातपि लौ ज़िपज्ञा कि तिंगला, नमला दिमु ला, कोंजोक मसीह ला दि जमंबुलिंग दु तोङा।
उत्पत्ति 3:15; 12:1-3; व्यवस्थाविवरण 18:15; 2 शमूएल 7; यिर्मयाह 31; यशायाह 59:16; दानिय्येल 7; मलाकी 4:5; यशायाह 7:14; मीका 5:2; यशायाह 9:1-7; 35:3-5; 61; 53; भजन संहिता 22:18; 35:19; 69:4; 41:9; जकर्याह 11:12-13; यशायाह 50:6; भजन संहिता 16:10-11 नासु बाइबल चिक कि टुंग