9.6 KiB
20. गुलामि और प्रतिज्ञा कि देश मे वापस लौटना।
इस्राएल कि राज्य रांग यहुदा कि राज्य ञिकार सु कोंजोक कि खिलाफ दिकपा चावा। खोशाक सु सिनै ला रु फेतकान थामजा ते चाक ताक। कोंजोक सु ङोनशि शोतकान याला खोशे दोरु ज्ञोतपा फेतचा रांग तेनै ञा मोलळम ज्ञकचा ला हा कोतचा ला ङोनशि शोतकान ला तांगबा, परन्तु खौशाक सु खोशि वुर ला माञिनबा।
था कोंजोक सु खोशि डया ला सोतचा ला शितचिन ज़ोए छिना सु राज्या ञिकार ला काहु काता। अश्शुर ते जिनमा राज्य नोक जो ज्ञमनि शेतचिन वोका। खोशाक जिनमा राज्य कि छिला ज्ञमनि ञिंगजिमु कांग वोका। खोशाक सु ओंगजा इस्राएल कि राज्य ला दिमित ज़ोताक। अश्शुरियों सु वोंगजा राज्य सु युम ला सात ताक, चि गोना कांग चोम ताक, तेनि छवनि कि ज़ा युम ला तुकताक।
अश्शूरियों सु तोलिअगुवों, छुकपु मिया, तेने नोर मिनजिन ज़ोआन मिया तोलि ला ञाबु दुया खोशाक सु अश्शूर देश ला खेरसाक। इस्रारल ना लिम मितपु इस्राएलि मि ते लु दिका।
तेने अश्शूरि मिया सु ओए छवनि रु दोतचा ला छिज्ञलयाला खेरचा वोंगबा। ओए छिज्ञल कि मिया सु ओए युल ला ञा ज़ोवाक। ओए ना लुशा वोकान इस्राएलि ला खोशाक सु नामा लिनबा। खोशाया कि रिह रुहा ला सामरि सेरका।
यहुदा कि राज्य कि मिया सु थोंआ कि कोंजोक सु खोला दिन मिछियान रांग खोए वुर मिञान ङान इस्राएलि कि राज्य कि मिया ला काहु कातपा। परन्तु वोतु क चाया सु कांग खोशाक सु कनानियो कि लाह कि मिहवा चावा। कोंजोक खोशाला हा कोतचि छिला ङोनशि शोतकान ला तंगबा, परन्तु खोशा सु माञिनंदा।
गन लौ ज्ञा कि गुपला अश्शूरियों सु इस्राएल कि राज्य ला दिमित ज़ो ताक। कोंजोक सु बेबीलोन कि ज्ञलवु नबुकदनेस्सर ला यहुदा कि राज्य ला हमला फिततु तांगबा। बेबीलोन ते शितचिन छवनि नोक। यहुदा कि ज्ञलवु ते नबुकदनेस्सर कि योकपु ला दोतचा रांग लोतांग नोर युम तेरचा ला ञिनबा।
था लौ युम कि तिंगला, यहुदा कि ज्ञलवु सु बेबीलोन कि खिलाफ भगावत चावा। तिंगला बेबीलोन सु लौकचा वोङशा यहुदा कि राज्यो ला छिलताक। खौशाक सु यरुशलेम ला कब्जा चाताक, गोनबा चाकता, तेने युल रांग गोनबा ओए तोलि कि नोर ठोहशा खेरसाक।
भगावत फेतचि छिना सु यहुदा कि ज्ञलवु ला ञोङदु जुकचा ला, नबुकदनेस्सर कि माहमि सु ज्ञलवु कि टु ला खोऐ दोरु सात ताक, तेने ज्ञलवु ला शारा ज़ोताक। ओए तिंगला, ओए ज्ञलवु ला बेबीलोन कि जेल रु शिडोया ला खिरसाक।
नबूकदनेस्सर रांग खोए माहमि यहूदा राज्य कि गन मि तोलि ला बेबिलोन ला खेरसाक, लिम सिंगसांग मि मितपु मिया ला ओए रु युहशा वोङ ताक ताकि खोशाक शिंगा ला तोदोक ज्ञाकचा ला। ओए नमला कि कालवा ला बंधुआई सेका जिसमे कोंजोक कि मिया ला णा कि छवनि नासु थोनजा माडोखामित ज़ोताक।
भले हि कोंजोक सु खोरि मिया ला खोशि दिकपा कि छिला बंधुआई ला खिरचा दडिंत चावा, वोतुक चाया कंग खो खोरि प्रतिज्ञा याला माज़िता। कोंजोक खोरि मिया ला तायिन दोतिका तेने खोरि ङोनशि शोतकान कि छिना सु वुर तोञिन दोतिका। कोंजोक सु णा किलवा कि लौ दुनज़ु कि तिंगला, खोशाक ञा णा किलसे छवनि रु लोकचा वोङाक।
गन लौ दुनज़ु कि तिंगला, फारस के ज्ञालवु कुस्रु सु बेबिलोन ला फामदु चुकताक, ओए छिला बेबिलोन के साम्राज्यज मानदा फारस के साम्राज्य सु छवनि युम ला शासन चावा। इस्राएलि मिया ला था यहुदि सेरका। खोशाया नांगना युम सु मिज़ि तोलि बेबिलोन दु क्यां ग ताक। यहुदि गतपु गनजिक ला मानि यहुदाकि छवनि आतला वोका।
फारसि मि ते ज्ञमनि जिनलाफ वोकान वोका, परन्तु खोशा सु खोरि ज्ञलशा वोकान मिया ला ञिङजिवा। फारसि मिया ज्ञलवु ज़ोवि गनजिक कि तिंगला, कुस्रु सु आदेश चिक तातपा कि यहुदा कि मिया फारस नासु थोनजा यहुदा ला डोमु वोतना डो छोका। ओए मागोता खोसु खोशे गोनबा ला ञा जोया ला मुल ततपा। था बंधुआई कि लौ दुनजु कि तिंगला, यहुदि गनजिक यहुदा राज्य कि यरुशलेम नगर ला लौकसा।
जब खोशाक यरुशलेम दु लितचि तिंगला खोशाक सु गोनबा रांग तेने युल कि थथि कि सिकपा तोलि ला ञा जोवा। फारसि मिया थांसाग कांग खोशाला शासन फेतिका। लेकिन खोशाक लनचिक ञा णा किलजि कि छवनि रु दोतिका तेने गोनबा रु मिहवा फेतिका।
2 राजा अध्याय 17; 24-25; 2 इतिहास 36; एज़्रा 1-10; नहेम्याह 1-13 नासु बाइबल चि की टुंग।