12 KiB
14. इस्राएलि मिया लौ गिपचु छुहु रिया रु खा छलजा।
कोंजोक सु इस्राएलियों ला ओए ला शोतचा सेनदू चुकपा जिनका खोशाकला थामजा दमशा वोकान ते तालङ नोक। तेने खोसु सीने ला नासु येला शेतकीन डोएका। खो खोशाकला थामजा की लारु खेरचा डोमु वोका। ओए छवनि ला कनान कागं सेरका। कोंजोक टिन के खमबा रु थागं ला-2 फुता, तेने को खो खोशे तिंगला-2 वोंगबा।
कोंजोक सु अब्राहम, इसहाक याकूब ला थामजा चाया वोका किओए थांमजा कि युल ते खोशे रिह रुहा ला तेरि, परन्तूो उइ जिना ओएना रिह रुहा युम दोतिका। खोशाला कनानी सेरका। ओए कनानि मिया कोंजोक
कोंजोक सु इस्राएलियों ला नावा, “ख्योशाक थामजा कि लुगबा रु फुतज़िना ओए कनानिया तोलि नासु सोसो ला दोत। खोशाक तांग ञाबु डिशा मादोत तेनि खोशाला नामा मालिन जिक। खयोशाक खोशे कुया तोलि ला छोक तोंग। खालते ख्योशाक ङाए वुर मिञान जाना तेने ख्योशाक ङाला तांगजा खोशे लाए मिहवा फेतका।“
था खोशाक कनानी कि सिमा रु लिपचासु, मूसा सु इस्राएल कि रिह रुहा नासु मि रे रे टु चुञि ला दामबा।खोसु खोशाला कनानि देश रु फुतचा चोकति फिततु तांगबा कि चुक दुआ तारु तांगबा। खोशाकला ओए कनानिया कि चोकति ला तांगबा शेतचिन दुआ कि शेत मिकान दुआ।
ओए मि चुञि ते शाकपा जिपचु कनान लुगंबा या तोलि ला ञुलजा ताया तेने लोकचा वोगंबा। खोशाक सु मिया ला नावा, ओय युल ते तोदोक दिमु कि युल यिनोक तोदोकं कांग युम वोंयिता यिनोक! ”तेने चोकति फितकान चु ते सु नावा,“ ओए युल ते युम शेतचिन दुक नावा तेनि मिया कांग रिंगबु रांग शेतचिन दुक।खालते वोशाक खोशाकला छिलजाना, वोशाक फाम थाकचोत नोक। तेने वोशाक ला सात तोङाक।“
वोते ज़िना कालेब रंग यहोशु दुरुंग जिनमा ञिसु नावा, “उइ दिमांग सेरेका कि खोशाक रिंगबु रंग शाङजिन दुक। परन्तु चुकसे यिनना कांग वोशाक खोशाक ला फाम दु जुगु छोका ! वोशे छिला कोंजोक लाक डियाक!
परन्तु यहोशु रंग कालेब कि वोर सु कांग माञिनबा। खोशाक मूसा रांग हारुन छिङनाह लांगजा वोका तेने नावा, ख्योत ङाशाला उइ जिहशि लुहबा रु चिला खेगंबा? वोशाक मिस्र तु वा दतमातोंवा। खालते वोशाक उइ लुगबा रु डोयाना, वोशाक लाक डियिन शि डाक। तेने कनान कि मिया वोशे नामा रांग चिवा ला योकपु ज़ो तोङा। था मिया ङा मिस्र ला लोकचा डोया ला खोशाला खेरकान अगुवा फातेका।
तेने खोशाक सु वोतुक चाया, कोंजोक ज्ञामनि छिङनाह लांगबा। तेने खो ओए खुर छिपु रु वोंगबा। तेने चावा, ख्योशाक सु ङा रांग ञाबु डोख्या चाजुंग। ओए छिला ख्योोशाक तोलि ला उइ रिया यारु खोंग खोरकिन दोतका। लौ निशु रांग ओए सांग छिपु मिया शिडाक। तेने ओए युल रु डो मिछोका ङा तेरकन ते रु। लिम कालेब रंग यहोशु ते डो छोका।
कोंजोक सु वोतुक सेरा मिया छौरा, खोशाक दुङाल चावा चिला सेरना खोशाक सु दिकपा चावा। ओए छिला खोशाक कनान कि मिया रांग लाक डिरु डोया से लावा। मूसा सु खोशाक ला माडो से हा काता। चिला सेरना कोंजोक खोशाक तांग ञाबु मिडोवा, परन्तुस खोशाक सु मुसा कि वुर माञिंदा।
कोंजोक दि माह थारचा ला खोशाक रंग ञाबु माफुता, ओए छिला कनानियों सु खोशाक ला फामदु चुकताक तेनि खोशाक युमला सात ताक। तेने इस्राएलि मिया कनान नासु लोक साक। था खोशाक लौ ज़िपचुछुहु रिया याला फाला छुला ञुलकिन दोतका।
इस्राएलि मिया लौ ज़िपचु रिया याला ञुलकिन दोतजिना, कोंजोक सु खोशाक ला चि गोशा वोतना कंग तातपा। खो सु खोशाक ला संज्ञि शिंगखाम नासु “मन्ना” सेरकान रोटि तातपा। खो सु बटेरो सेरकान छा चिव ला खोशे दोतसा रु तांगबा। खोशाक ला शिया सालांग वोगंजा ला। कोंजोक सु खोशे खोनजा रांग काफशा फा शाहरु माचुकपा।
ओए मागोता डोंगखांग चाकचा छु थुंगलाङ तोनशा तातपा। ओए सिंग कि तिंगला कांग इस्राएलि मिया सु मूसा रांग कोंजोक कि खिलाफ कुन टुहवा तेने डंगबा। तेने यांग कोंजोक ला दिन छिलांग वोका। खो थामजा चाया वोका कि अब्राहम, इसहाक, तेने याकूब कि रिह रुहा कि खो फेतका। खो सु वोतुक चावा।
तेने ङा लान चिक खोशाला छु मित ज़िना कोंजोक सु नावा, डोंगखांग ला वर थोंग, तेने छु थोंनङा परन्तु मूसा सु वुर मातांगबा। कोंजोक कि वर ञानजे मिति खाला खोसु बिकपा ते लानमा नि डोंगखांग ला ज्ञपा। कोंजोक ला माञानदा। तोलि कि छिला छु ता थोंनबा परन्तु कोंजोक सु मूसा ला छिंङनाह चावा, तेने नावा, चिला सेरना ख्योत सु वोतुक चावा ओए छिला ख्योत प्रतिज्ञा कि युल ला डो मिछोका।
इस्राएलि मिया लौ ज़िपचु छुहु रिया याला खोरकिन दोत ज़िना, कोंजोक कि खिलाफ बलवा फेतकान तोलि शि साक। तेने कोंजोक सु खोशा ला ङा प्रतिज्ञा कि युल कि सिवाने छुहु खेरा। था मूसा ते गतपु फुसा, ओए छिला कोंजोक कि अगुवाइ फेचा ला यहोशु ला रोह ला खेंगबा। कोंजोक सु मूसा रांग ञाबु प्रतिज्ञा चाया वोका। शाकचिक खोशे छिला मूसा कि लामु ङोनशे शोतकान तोए।
तेने कोंजोक सु मूसा ला लाइ गौ रु सोंग नावा प्रतिज्ञा कि युल ला ताया ला। मूसा प्रतिज्ञा कि युल ला तावा परन्तु खोला ओए रु डो छोक लांग मिका। तेने मूसा शि साक, तेने इस्राएलि मिया शाकपा सुमजु ते दुकपु चावा। था यहोशु ते सोमा शोतकान ते नोक, चिला सेरना खो कोंजोक ला दिन छियान नोक तेने खोए वुर ला ञानङान नोक।
निर्गमन अध्याय 16-17; गिनती 10-14; 20; 27; व्यवस्थाविवरण 34 नासु बाइबल चिक की टुंग।