2.5 KiB
33. Paramiz e sejačestar
Jekh dive, o Isus sikaj ine bute manušen uzali obala e jezerosiri. Edobor manuša ale te šunen le, da o Isus đerdinđa ano čamco savo inele ikaldo ki obala uzalo pani sar te šaj ovel le dovoljno than te vaćeri lenđe. Beštino ano čamco hem sikavđa e narodo.
O Isus vaćerđa lenđe akaja paramiz: "Jekh sejači iklilo te frdel seme. Sar ine vasteja frdela o seme, nesavo seme perela ine ko drom, i ađahar avena ine o čiriklja hem xana sa adava seme."
"Aver seme perela ine ko than ano saveste inele više bara nego phuv. O seme savo pelo ko adava than sigate ine barjola, ali o koreno našti ine te đerdini ano xor e phuvjakoro. Ked o kham iklilo hem ked ulo tatipe, o biljke šućile hem mule."
"A palem, aver seme perela ine maškaro kare. Ov ine lela te barjol, ali o kare tasavena le ine. Adalese, o biljke save barjona ine taro seme savo perela ine maškaro kare na dinđe nisavo bijandipe."
"A aver seme perela ine ki šukar phuv. Ov barjola ine hem dela 30, 60 ili đi 100 puti više semenja nego so inele sadime. Phraven tumare kana te šunen!"
Akaja paramiz zbuninđa lesere učenikonen. Adalese o Isus objasninđa: "O semei e Devlesoro lafi. O drom predstavini e manuše kova šunela e Devlesoro lafi, ali na xaljola le, i ađahar o beng lela lestar o lafi."
"O than kote isi but bara predstavini e manuše kova šunela e Devlesoro lafi hem lela le radosno. Ali, ked avena lese o poteškoće ili o progonstvo, perela hem na džala više palo Devel."
"O than kote isi kare predstavini e manuše kova šunela e Devlesoro lafi, ali sar o vreme nakhela, ađahar o brige, o barvalipe hem o šukaripe akala phuvjakoro tasavena lesoro manglipe premalo Devel. I sar rezultat adalestar, o sikajba savo šunđa na dela bijandipe."
"Ali, i šukar phuv predstavini e manuše kova šunela e Devlesoro lafi, verujini lese hem anela bijandipe."
E biblijakiri paramiz taro Matej 13,1–8, 18-23; Marko 4,1–8, 13-20; Luka 8,4–15