rmy-x-vwa_obs/content/15.md

56 lines
4.3 KiB
Markdown

# 15. I Obećime phuv
![OBS Image](https://cdn.door43.org/obs/jpg/360px/obs-en-15-01.jpg)
I alo o vreme o Izraelci te đerdinen ano Hanaan, ani Obećime phuv. O Isus Navin bičhalđa duje muršen te dikhen savi e hanaanesiri diz Jerihon, savi inele zaštitime ađahar so inele okružime zorale duvarencar. Ani adaja diz živinđa jekh prostitutka palo anav Raava, savi garavđa e duje muršen hem kasnije pomožinđa lenđe te našen. Ćerđa adava adalese so verujinđa ano Devel. O duj murša obećinđe da ka zaštitinen e Raava hem lakere porodica ked o Izraelci ka uništinen o Jerihon.
![OBS Image](https://cdn.door43.org/obs/jpg/360px/obs-en-15-02.jpg)
O Izraelci valjanđe te nakhen i len Jordan te šaj đerdinen ani Obećime phuv. O Devel phenđa e Isus Navinese: "O sveštenici nek džan prva." Ked o sveštenici čhivđe pumare pre ani len Jordan, o pani ačhilo te thavdel sar te šaj o Izraelci nakhen ki aver strana upri šuki phuv.
![OBS Image](https://cdn.door43.org/obs/jpg/360px/obs-en-15-03.jpg)
Ked o manuša nakhle i len Jordan, o Devel sikavđa e Isus Navine sar te napadini i zorali diz Jerihon. O narodo šunđa e Devle. O vojnici hem o sveštenici šov dive phirindoj okolinđe i diz Jerihon jekhvar ko dive, sar so phenđa lenđe o Devel te ćeren.
![OBS Image](https://cdn.door43.org/obs/jpg/360px/obs-en-15-04.jpg)
I ko eftato dive, o Izraelci phirindoj okolinđe i diz pana efta puti. Sar ine okolinena i diz zadnjo puti, o vojnici vičinđe, a o sveštenici phudinđe ano trube.
![OBS Image](https://cdn.door43.org/obs/jpg/360px/obs-en-15-05.jpg)
Tegani e Jerihonesere duvarija pele! O Izraelci sa uništinđe ani diz sar so phenđa lenđe o Devel. Samo na dirinđe e Raava hem lakere porodica, kola pridružisale e Izraelconenđe. Ked avera nacije save živinđe ano Hanaan šunđe so o Izraelci uništinđe o Jerihon, but darandile da o Izraelci hem olen ka napadinen.
![OBS Image](https://cdn.door43.org/obs/jpg/360px/obs-en-15-06.jpg)
O Devel naredinđa e Izraelconenđe te na phanden mir nijekhe narodoja taro Hanaan. Ali jekh narodo taro Hanaan, savo vičinđa pe Giveon, xovavđa e Isus Navine hem phenđa lese da avela taro than savoi dur taro Hanaan. Rodinđe e Isus Navinenstar te phanden mir olencar. O Isus Navin hem o Izraelci na pučle e Devle kotar ale o Giveonci, i o Isus Navin phandlja mir olencar.
![OBS Image](https://cdn.door43.org/obs/jpg/360px/obs-en-15-07.jpg)
O Izraelci inele but xoljame kad dodžanđe so o Giveonci xovavđe len, ali ićerđe pe ko adava so phandle mir olencar adalese so adava inele obećanje anglo Devel. Ked nakhlo nesavo vreme, o carija jekhe avere narodosere ano Hanaan, o Amorejci, šunđe so o Giveonci phandle mir e Izraelconencar, i čedinđe pumara vojska ki jekh bari vojska hem napadinđe e Giveonconen. O Giveonci rodinđe pomoć e Isus Navinestar.
![OBS Image](https://cdn.door43.org/obs/jpg/360px/obs-en-15-08.jpg)
I ađahar, o Isus Navin čedinđa e izraelesere vojska, i sa i rat phirđe sar te aven koro Giveonci. Sabaleja iznenadinđe e Amorejconen hem napadinđe len.
![OBS Image](https://cdn.door43.org/obs/jpg/360px/obs-en-15-09.jpg)
Adava dive o Devel marđa pe zako Izraelci. Zbuninđa e Amorejconen hem bičhalđa bari kukudi savi mudarđa bute Amorejconen.
![OBS Image](https://cdn.door43.org/obs/jpg/360px/obs-en-15-10.jpg)
O Devel da ćerđa o kham te terđol sa ko jekh than, sar te ovel e Izraelconen dovoljno vreme te pobedinen e Amorejconen. Adava dive o Devel anđa bari pobeda zako Izraelci.
![OBS Image](https://cdn.door43.org/obs/jpg/360px/obs-en-15-11.jpg)
Palo adava so o Devel pobedinđa adala vojska, but avera narodija čedinđe pe te napadinen e Izraelconen. O Isus Navin hem o Izraelci napadinđe len hem pobedinđe len.
![OBS Image](https://cdn.door43.org/obs/jpg/360px/obs-en-15-12.jpg)
Palo adava mariba, o Devel dinđa đijekhe izraelskone pleme lesoro kotor oti Obećime phuv. Tegani o Devel dinđa mir e Izraelese ko sa o granice.
![OBS Image](https://cdn.door43.org/obs/jpg/360px/obs-en-15-13.jpg)
Ked o Isus Navin inele purano, vičinđa sa e Izraelconen. Podsetinđa len ki lengiri obaveza te oven poslušna zako savez savo o Devel ćerđa e Izraelconencar ko Sinaj. O narodo obećinđa da ka ačhol verno e Devlese hem da ka ićeri lesere naredbe.
_E biblijakiri paramiz taro lil e Isus Navinesoro 1-24_