rml_rhb/08-RUT.usfm

\id RUT RML_RHB rml_Baltic⋅Romani_ltr - RusskaRoma Holy Bible Thu Dec 30 2021 20:21:52 GMT+0200 (Восточная Европа, стандартное время) tc
\usfm 3.0
\ide UTF-8
\h Руфь
\toc1 Книга Руфь
\toc2 Руфь
\toc3 Rut
\mt Руфь
\cl Шэро
\c 1
\p
\v 1 До сэндаритка дэвэса, пэ пхув сыс бокхалыпэн. Ек мануш Вифлиемостыр Иудаскирэстыр ёв и лэскири ромны дуе чяворэнса гинэ тэдживэн пэ маля Моаво́скирэ.
\v 2 Адалэс  манушэс кхарэ́н Елимеле́хо, ромня́ лэ́скирья кхарэ́н Ноеми́нь, а дуен чявэ́н лэскирэн кхарэн Махло́но и Хилео́но, ефрафя́не Вифлеемосты́р Иудаскирэсты́р. Ёнэ явнэ́  пэ маля́ Моаво́скирэ и ачнэ́пэ одо́й. 
\v 3 И мэя́ Елимеле́хо, Ноеминя́киро ром, и ачяпэ ёй дуе́ чяворэ́нса. 
\v 4 И лынэ́ ёнэ́ ромне́н моавитянкэ́н — екха́ кхарэ́н Орфа́, а авирья́ Ру́фь.  Ёнэ́ одо́й джиндэ варика́й ко дэш бэрш. 
\v 5 А тэнче мэнэ́ сарэ́ дуй чявэ Махло́но и Хилео́но. И ачяпэ адая́ ромны́ би чяворэ́нгиро и би ромэ́ско. 
\v 6 И скэдыя́пэ ёй пэ́скирэнса борье́нса и ґия́ палэ́, мале́ндыр Моаво́скирэндыр дя́кэ сыр шундя́ пэ маля́ Моаво́скирэ, со Дэвэ́л на ачядя пэ́скирэн манушэ́н и бичявдя́ лэ́нгэ маро́. 
\v 7 И выгия́ одолэ́стыр штэтосты́р, кай дживэ́нас ёй и ла́кирэ дуй борья́. И ґинэ́ ёнэ́ пиро́ дро́м, тэ рисё́н пэ пху́в Иуда́скири. 
\v 8 И пхэндя́ Ноеми́нь пэ́скирэнгэ борье́нгэ: Джянте, рисё́нте сарэ́ дуй до кхэ́р кэ пэ́скири да́й. Мэк отлыджялпэ кэ тумэ Дэвэл камлыпнаса, сыр и тумэ́ отлыджинэпэ кэ мэ и кэ пэскирэ рома савэ мэнэ! 
\v 9 Мэк дэл тумэ́нгэ Дэвэ́л, соб тумэ́ тэ попэрэ́н бахт до кхэр кэ пэскирэ рома! И чямудя́ лэн. А ёнэ́ гадынэ́ ґо́дла и зарондэ́. 
\v 10 И пхэндэ́: Нат, амэ́ ту́са рисёва́са кэ тырэ́ мануша. 
\v 11 А Ноеми́нь пхэндя́: Рисё́нте, чяя́ мирє! Пал со тумэ́нгэ тэ джя́н ма́нса? Чи явэ́на ма́ндэ чяворэ́, соб ёнэ тэ явэ́н тумэ́нгэ ромэ́нса? 
\v 12 Рисё́нте,  чяя мирэ́ ! Джя́нте, пал одова, со мэ пураны́ манушны́, соб тэ джя́в па́ло ром. Сыр мэ тэ пхэна́в  тумэнгэ  со мэ джява поло ром, и сыр б мэ тэ ява́в дэ дая́ рат ромэ́са, и тэ биянав чавэн.
\v 13 Чи лэна тумэ, тэ дужакирэн сыр ёнэ выбарьёна? Пэ со тумэнгэ тэ закэрэнпэ соб тэ наджян пало ром? Нат, чяя́ мирэ, ма́нгэ, дрыва́н пхаро́ пал тумэ́ндэ. пал одова́ со домэкья ма́нгэ васт Дэвлэ́скиро. 
\v 14 И гадынэ́ ёнэ́ бари́ ґо́дла и лынэ́ тэ ровэ́н. И чямудя́ О́рфа пэ́скирья свекруха́ сыр лакэ тэджял, а Руфь ачяпэ ла́са. 
\v 15 И пхэндя́ ёй: Гэна, рисия́ одоя́ бори́ кэ пэ́скирэ мануша́ и кэ пэ́скирэ дэвэла́. Рисёв и ту сыр рисия́ ёй. 
\v 16 И пхэндя́ Руфь: На́вракир ман тэ ачкирав тут и тэ на джя́в пал ту́тэ. Кай джя́са ту — одори́к джява и мэ. Кай ту лэ́са тэ дживэ́с — одо́й и мэ ла́ва тэ джива́в. Тырэ мануша́ — мирэ́ мануша, и тыро́ Дэвэ́л авэла миро Дэвэ́л. 
\v 17 Кай ту мэрэ́са — и мэ мэра́ва, и ман одо́й ґаравэ́на. Мэк Дэвэ́л ма́нгэ кэрэ́ла дя́кэ и дя́кэ, сыр мэ ачкирава тут екджиня́. И сыр мэ мэра́ва, тэнчи ачкирава тут. 
\v 18 Удыкхья́ ёй, со Руфь дрыван камэ́л тэ джя́л  ла́са, и пирья́чя тэ отракирэ́л ла. 
\v 19 И ґинэ́ ёнэ́ дуйджинэ́, и явнэ́ до фо́ро Вифлее́мо. И сы́с дя́кэ: сыр явнэ́ ёнэ́ до Вифлее́мо, то заракирдя́ пал лэ́ндэ саро́ фо́ро, и джювля́ ракирэ́нас: «Ада́ Ноеми́нь?» 
\v 20 И ёй пхэндя́ лэ́нгэ: «На кхарэ́нте ман Ноеми́нь. Кхарэ́нте ман Мара, пал дова́ со джиипэ́н миро́ дрыва́н кирко́ Дэвлэ́стыр. 
\v 21 Мэ выгиём кхэрэсты́р мандэ сыс саро, а Дэвэ́л ман рискирдя́ палэ́ би нисо́ско. Пал со тэ кхарэ́н ман Ноеми́нь, сыр Дэвэл дыя пхаро джиипэн мангэ, и Баро Дэвэл бичявдя пэ мандэ бида ?» 
\v 22 И рисия́ Ноеми́нь, и Руфь моавитя́нка, ла́кири бори́, дуйджинэ́ рисинэ́ Моаво́скирэ мале́ндыр. И явнэ́ ёнэ́ до Вифлее́мо до дэвэса сыр лынэ тэ скэдэ́н о маро́.
\c 2
\p 
\v 1 Кэ Ноеми́нь сы́с пэ́скиро ману́ш пи́рэ ромэ́стэ, лэс кхарэ́н Воо́зо, ёв сы́с баро́ ману́ш и сы́с Елимеле́хоскирьятыр семья́тыр. 
\v 2 И пхэндя́ Руфь моавитя́нка Ноеминя́кэ «Джя́ва мэ по маля́ и ла́ва тэ подкэда́в маро́  палал кє одолє, кон ман на вытрадэ́ла» Ёй пхэндя́ ла́кэ: «Джя, чяй мири́.» 
\v 3 Ёй ґия́, явья́ по маля́ и лыя тэ подкэдэ́л, со ачелпэ пал одолэ́ндэ кон скэдэ́лас маро́. И выґия́ дя́кэ, со адая́ пхув сы́с Воозоскири́ саво́ Елимеле́хоскирьятыр семья́тыр. 
\v 4 И, явья́ Воозо Вифлеемосты́р и пхэндя́ одолэ́нгэ, кон скэдэ́лас маро́: Тэ явэ́н бахталэ́ Дэвлэ́стыр! А ёнэ́ пхэндэ́ лэ́скэ: Тэ авэ́с и ту бахтало́ Дэвлэ́стыр! 
\v 5 И пхэндя́ Воозо пэ́скирэскэ бутярнэ́скэ, савэ́с чидя́ пхурэдырэ́са пє манушаєндє, савэ́ скэдэ́нас маро́: «Конэ́скири ада́я тэрны́ чяй?». 
\v 6 И пхэнэ́л бутярно́ Воозоскэ: «Ада́я тэрны́ чяй моавитя́нка, ёй рисия́ Ноеминя́са сави́ дживэ́лас пэ пхув Моаво́скири. 
\v 7 Ёй пхэндя́: «Мэ ла́ва тэ подкэда́в пала́л маро́ саво ачелпэ пал одолэ́ндэ кон укэдэ́л маро́. Ёй явья́ ра́нэс и кэрэ́л буты́ ада́й кэ дава́ ча́со. Чячо набут побэстя́ дэ ша́тра». 
\v 8 И пхэндя́ Воо́зо Руфа́кэ: «Пошу́н ман, чяй мири́! На джя пэ ави́р маля́ тэ подкэдэ́с маро́, и на уджя́ ада́цыр, а яв ада́й паш мирэ́ндэ бутярнэ́ндэ. 
\v 9 Дыкх пэ мал, саво ёнэ́ укэдэ́н, и пхир пал лэ́ндэ. Чи мэ на прыпхэндё́м бутярнэ́нгэ, соб ёнэ́ тэ на поджя́н кэ ту? Сыр закамэ́са тэ пье́с, поджя́ кэ вэ́дра пане́са и пи паны́ саво́ яндэ́ бутярнэ́». 
\v 10 Ёй пэя́ лэ́скэ до гэра́ и пхэнэ́л: «Со мэ кэрдём да́саво дэ тырэ́ якха́, со ту сыкавэ́с ма́нгэ пэ́скиро лачипэ́н, и приджинэс ман, нэ ту джинэс со мэ нанэ́ тумарэ́ манушэндыр?» 
\v 11 Воо́зо пхэнэ́л ла́кэ: «Роспхэндэ́ ма́нгэ саро́, со ту кэрдя́н пэ́скирьякэ свекруха́кэ, сыр мэя́ тыро́ ром, кай ту ачкирдян дадэ́с тэрэ́с и пэ́скирья да, и пхув кай ту бияндыян и явья́н кэ мануша́, савэ́н ту кэ дава́ на джиндя́н. 
\v 12 Пал дава́ со ту кэрдя́н, мэк Дэвэ́л дэ́ла ту́кэ бахт и тыри́ бахт авэ́ла дэ саро́ Дэвлэ́стыр, Дэвэ́л Израилёскиро, кэ Саво́ ту явья́н, тэ заракхэ́л тут пэ́скирэса вастэ́са!» 
\v 13 И пхэндя́ ёй: «Мангав тэ здыкхэспэ пэ мандэ, миро́ рай, пал дава́ со ту подрикирдя́н ман и пхэндя́н лава́ савэ́ заґинэ́ ма́нгэ до ило́ тырэ́ бутярня́кэ, нэ мэ нанэ́ екх тэриэндыр  бутярныэндыр». 
\v 14 И пхэндя́ ла́кэ Воо́зо сыр ёнэ́ ха́нас: «Поджя́ ада́рик, лэ маро́ и ки́нкир тэро́ коты́р до уксусо́ и ха». Ёй бэстя́ паш бутярнэ́ндэ, и ёв дыя ла́кэ мариклы́. Ёй хая и чялыя́, и латэ ачядяпэ. 
\v 15 Ёй вштыя́, гия тэ подкэдэ́л, Воо́зо прыпхэндя́ пэ́скирэнгэ бутярнэ́нгэ: «Мэк ёй подкэдэ́л и па́шо сно́пы, и на́годлэн пэ ла́тэ. 
\v 16 И отчюрдэ́н ла́кэ снопэнды́р и ачкирэн, соб ёй тэ подкэдэ́л, и на ґодлэ́н пэ ла́тэ». 
\v 17 Адя́кэ ёй подкэдэ́лас по маля́ кэ бэвэ́ль и вымардя́ одова́, со подкэдыя́, и  сы́с варика́й паш ґоно́ маро́. 
\v 18 И гадыя ёй адава паш гоно маро, и лыджия до фо́ро, и удыкхья́ ла свекру́ха, и со ёй скэдыя́. И доростя́ Руфь мариклы савятыр ёй хая и дыя лакэ тэхал.  
\v 19 И пхэндя́ ла́кэ свекру́ха ла́кири: «Кай ту сы́с дадэвэ́с и кэ кон кэрэ́сас буты́? Мэк авэ́ла бахтало́ дова́ ману́ш саво́ подрикирдя́ тут». И роспхэндя́ ёй пэ́скирякэ свекруха́кэ, кэ кон ёй кэрэ́лас буты́, и пхэндя́: «Манушэ́c адалэ́с кэ саво́ мэ кэра́вас буты́ кхарэ́н Воо́зо». 
\v 20 И пхэндя́ Ноеми́нь пэ́скирьякэ борья́кэ: «Бахтало́ ёв Дэвлэ́стыр — одова́ кон рикирэ́л до ило́ джидэ́н и мулэ́н!» И пхэндя́ ла́кэ Ноеми́нь: «Пэ́скиро амэ́нгэ адава́ ману́ш. Ёв екх одолэндыр пэскиро родостыр саво́ трэби тэ выкинэ́л». 
\v 21 И пхэндя́ Руфь моавитя́нка: «И ёв ма́нгэ пхэндя́: «Рикирпэ́ паш мирэ́ндэ бутярнэ́ндэ, скицы́ ёнэ́ лэ́на тэ скэдэ́н миро́ маро́. 
\v 22 И пхэндя́ Ноеми́нь Руфа́кэ, пэ́скирьякэ борья́кэ: «Куч, чяй мири́, со ту авэса тэ выджя́с лэскирэ́нса бутярнэ́нса, и пэ ту́тэ на лэ́на ничи тэ ракирэ́н пэ ави́р маля́». 
\v 23 И ёй рикирэ́ласпэ па́ш бутярнэ́ндэ Воозоскирэ́ндэ и подкэдэ́лас маро́ кэ долэ дэвэса сыр пирьячнэ тэ укэдэн саро́ маро́, и дживэ́лас пескирья́са свекруха́са.
\c 3
\p 
\v 1 И пхэндя́ Ноеми́нь свекру́ха лакири: «Чай мири́ чи на ла́ва мэ тэродэ́в ту́кэ миштыпэн, соб  тє авєл ту́кэ  куч? 
\v 2  Воозо саво амєнгє пэ́скиро, —  кэ саво ту кэрэсас буту служанкэ́нса? Гэ́на, ёв дэ дая́ рат пирэкэдэ́л до анга́ро зёрно́. 
\v 3 Выморпэ и ма́кхпэ, ури́ пэ пэ́стэ ґо́жо и́дя пэ́скири, и джя до анга́ро. Насыкав пэс адалэ манушэскэ, кэ дова́ сыр ёв на пирьячела тэ ха́л и тэ  пье́л. 
\v 4 Сыр жэ ёв джяла тэ совэ́л, ту уджи́н штэ́то кай ёв пасёл, тэ́нче явэ́са откэрэ́са цэрга и пасёса лэстэ до гэра, а ёв пхэнэ́ла ту́кэ, со тэ кэрэ́с». 
\v 5 Руфь пхэндя́: «Саро́, со ту ракирэ́с, мэ кэра́ва». 
\v 6 Ёй ґия́ до анга́ро и кэрдя́ саро́ адя́кэ, сыр пхэндя́ ла́кэ свекру́ха. 
\v 7 И чалыя Воо́зо и подпия и злоша́лыя лэ́скиро ило́. Ёв явья́ и пасия́ дэ ски́рда по пхуса́. Ёй нанэшундэс погия, откэрдя́ цэрга и пасия́ лэскэ до гэра́. 
\v 8 И дэ паш рат, здара́ндыя одова́ ману́ш и пирискирдя́пэ, и гэ́на, дыкхэ́л, джювлы пашлы́ лэ́стэ до гэра́. 
\v 9 И пучья́ ёв: «Кон ту?» И пхэндя́ ёй: «Мэ Руфь, тыри́ бутярны́. протырдэ пэ́скиро васт пэ тырья́тэ бутярня́тэ, пал одова́ со ту пэ́скиро родостыр — выкинэ́са». 
\v 10 И пхэндя́ ёв: «Бахталы ту Дэвлэ́стыр, мири́ чай! Куч, со ачянпэ патывалы и тырэ рынды, хвэды́р первонэ́ моло́стыр, со ту кэрдя́н, пал одова́ кай ту на ґия́н па́л тэрнэ́ндэ: ни па́л чорорэ́ндэ, ни па́л барвалэ́ндэ. 
\v 11 А кана́, чай мири́, на́дарпэ: саро́, со ту пхэндя́н, мэ кэра́ва ту́кэ,  дякэ сыр сарэ мануша до форо джинэн, со ту молэс лачо лав. 
\v 12 И адава, чачё, со мэ пэ́скиро родостыр саво́  выкинэ́ла, нэ сы́н родостыр ману́ш  саво́ трэби тэ выкинэл и ёв пашэдыр мандыр . 
\v 13 Ра́ткир адая́ рат, а тася: сыр ёв выкинэ́ла тут, ада куч, мэк выкинэ́л, а сыр на закамэ́ла тэ выкинэ́л, то мэ выкина́ва тут. Джидо́ Дэвэ́л! Сов адая рат». 
\v 14 Ёй сутя́ дая рат дэ лэ́скирэ гэра́ и вштыя́ кэ дова́, сыр ману́ш лыя дыкхэ́л авирэ́с манушэ́с. И пхэндя́ ёв: «Мэк на джинэ́н, со сыс ада́я джювлы  до анга́ро». 
\v 15 И пхэндя́ ёв: «Подэ́ упратуны́ и́дя, сави́ пэ ту́тэ, и пори́кир ла». Ёй рикирэ́лас ла, а ёв откэдыя́ шов ме́ры зёрно, чидя́ пэ ла́тэ и ґия́ до фо́ро. 
\v 16 И явья́ ёй кэ пэ́скири свекру́ха. И одоя́ пхэндя́: «Кон ту, мири́ чай?» И роспхэндя́ ёй ла́кэ пал саро́, со кэрдя́ ла́кэ одова́ ману́ш. 
\v 17 И пхэндя́: «Адалэ́ шов ме́ры зёрно ёв дыя ма́нгэ,и ёв пхэндя́: «На джя́ би нисо́скиро кэ пэ́скири свекру́ха». 
\v 18 И пхэндя́ ёй: «Побэ́ш, чай мири́, тэ уджинас, со явэ́ла дурэды́р. Пал дова со  адава́ ману́ш на улэ́лапэ, сыр ёв на докэрэ́ла адава́ рындо дадэвэ́с».
\c 4
\p 
\v 1 Воо́зо гадыя́пэ кэ хворы́тка вуда́ра и бэстя́ одо́й. И гэ́на, джял одова́ ману́ш — саво́ трэ́би тэ выкинэ́л, пал савэ́стэ ракирдя́ Воо́зо. И пхэндя́ лэ́скэ: «Заджя́,прибэ́ш ада́й морэ ». Ёв загия́ и прибэстя́. 
\v 2 И лыя́ ёв дэшэ́н манушэ́н пхурэдырэ́н до фо́ро и пхэндя́: «Бэшэ́н ада́й». И ёнэ́ бэшнэ́. 
\v 3 И пхэндя́ ёв ада́лєскє манушэ́ске саво́ трэ́би тэ выкинэ́л: «Коты́р мал, саво́ исы́ амарэ́ пшалэ́ско Елимелехо́ско, бикнэ́л Ноеми́нь, сави́ рисия́ Моаво́скирэндыр мале́ндыр. 
\v 4 И гэ́на мэ пхэндём, кай ту тэ шунэ́с, со мэ ракира́в: кин пашэ́ амарэ́ндэ пхурыдырэ́ндэ манушэ́ндэ. Выкинэ́са — выки́н, а сыр на выкинэ́с, пхэн ма́нгэ, соб мэ тэ джина́в.Бутыр тутыр нанэ кон тэ выкинэл, сыр ту на выкинэ́са, а пал тутэ- мэ ». И пхэндя́ ёв: «Мэ выкина́в». 
\v 5 И пхэндя́ Воо́зо: «До дэвэ́с, сыр ту кинэ́са мал вастэ́стыр кэ Ноеми́нь, ту трэби́ тэ викинэс и кэ Руфь моавитянка,савятэ мэя ром, соб тэ на хасёл родо пшалэско саво мэя». 
\v 6 И пхэндя́ одова́ ману́ш,родостыр сово трэ́би тэ выкинэ́л: «Ма́нгэ на выджя́л тэ выкинав пэ́скэ, долэскэ со мэ хаскирава саро миро со мандэ сын.Лэ пал пэстэ миро́ право́ тэ выкинэ́с, пал одова́ со ма́нгэ на выджя́л тэ выкинав». 
\v 7 А кэ дава́ до Израилё сыр выкинэ́нас и парувэ́нас сы́с заве́дено тэ кэрэ́н сарэ́ рынды адя́кэ: Ману́ш злэ́лас пэ́скири тэра́х и отдэ́лас авирэ́скэ и адалэса ёв допхэнэлас рындо саво кэрдэ до Израилё. 
\v 8 И пхэндя́ одова́ ману́ш родостыр, саво́ трэ́бинэ тэ выкинэ́л Воо́зоскэ: «Кин пэ́скэ», и слы́я пэ́скири тэра́х. 
\v 9 И пхэндя́ Воо́зо пхурэдырэ́нгэ и сарэ́нгэ манушэ́нгэ: «Тумэ́ шундэ́ дадэвэ́с, со мэ кина́в саро́, со исы́н Елимелехо́скиро, и саро́, со исы́н  Хилеоно́скиро и Махлоно́скиро, вастэ́стыр кэ Ноеми́нь. 
\v 10 Дя́кэ жэ и Руфь, моавитя́нка, ромня́ Махлоно́скиря, мэ лав ла пэскэ па́ло ром, соб тэ нахасёл лав мулэ́скиро дэ лэ́скиро ро́до, тэ ачелпэ лав лэ́скиро ва́ш лэ́скирэ пшалэ́ндэ дэ лэ́скиро кхэ́р. Дадэвэ́с тумэ́ сарэ́ шундэ́ адава́».
\v 11 И пхэндэ́ сарэ́ мануша́, савэ́ сыс па́ш вуда́ра хворы́тка, и пхурэ́ мануша́: «Амэ́ шундя́м. Мэк Дэвэ́л дэл соб ромны, сави́ заджя́л дэ тэро́ кхэ́р,явэла сыр Рахиль и Лия, савэ́ дуйджинэ́ скэрдэ́ кхэ́р Израилёско. Джив дякэ тэ джял лачё лав дэ Ефрафо и тэ шунэ́н пал тутэ до Вифлее́мо. 
\v 12 И мэк явэ́ла тэро́ кхэ́р, сыр кхэ́р Фаресо́ско, савэ́с бияндя́ Фома́рь Иуда́скэ, тэрэ́ чяворэнды́р савэ́н дэ́ла ту́кэ Дэвэ́л адала́тыр тэрнэ́ манушня́тыр». 
\v 13 Воо́зо лыя́ Руфь, и ёй кэрдя́пэ лэ́скири ромны́. Ёв сыс ла́са, и Дэвэ́л дыя́ ла́кэ кай ёй запхари́я, и ёй бияндя́ чавэ́с. 
\v 14 И ракирэ́нас джювля́ Ноеминя́кэ: «Благословенно Дэвэ́л, Саво́ на ачадя́ тут би манушэско родостыр, саво́ выкиндя́ тут дадэвэ́с! И мэк явэ́ла шундо́  лэскиро лав до Израилё! 
\v 15 И ёв подрикирэла тут и додыкхэла тут дэ тыро пураныпэ́н, пал одова́ со бори́ тыри́, сави́ камэ́л тут, лэс биандя́, сави́ ваш ту́кэ хвэды́р эфта чавэ́ндыр». 
\v 16 И лыя́ Ноеми́нь далэ́с чаворэ́с и облыя́ лэс, и дыкхэ́лас пал лэ́стэ. 
\v 17 И дынэ лэскэ лав джювля́ савэ́ джювэ́нас пашэ лэ́ндэ, ракирдэ́ дя́кэ: «Бияндыя чаво́ кэ Ноеми́нь», — и кхардэ́ лэс Ови́д. Ёв дад Иесиёскиро, а Иесеё дад Давидо́скиро. 
\v 18 И гэ́на ро́до Фаресо́ско: Фаре́со дат Есромоскиро, 
\v 19 и Есромо дат Арамоскиро, и Арамо дат Аминадавоскиро, 
\v 20 и Аминадаво дат Наассоноскиро, и Наассоно дат Салмоноскиро, 
\v 21 и Салмоно дат Воозоскиро, и Воозо дат Овидоскиро, 
\v 22 и Овидо дат Иесиёскиро, и Иесеё дат Давидоскиро.